Avre sus puertas el 2 Novembre, despues de la desizion importante tomada el 6 de Oktobre en Londra, grasias al dirijente, Ali Güreli
El sinyor Ali Güreli imajino lo impensable i akordo importansia a la inovasion de instalar una mankura en muestro pais, UN FUAR de ARTE, desde 2006.
Interesado, insistio a la beyeza en introdusiendo galerias estranjeras internasionales a vinir ekspozar en Estambol, djuntos kon las galerias lokales i sus artistos.
El kurator del fuar es el reputado kritiko de arte i istoriano, MARC OLIVIER WAHLER. Oy en dia, es el dirijente de galerias de arte de Michigan, del Palasio de Tokyo, de Paris.
En los anyos 2006, kuando tomi parte en este fuar kon 7 tablós al olyo, solo 37,500 amantes de artes fueron prezentes para vijitarlo... Akel anyo, el total de las ovras ekspozadas para la vendida valia 7.2 milyon de dolares. En 2015, uvo 86,000 vijitadores, 67.4 milyon de dolares de ovras ekspozadas para la vendida...
En 2015, el grande sukseso fue el potensial i la prezensia de los estudiantes, las famiyas akompanyadas de sus ninyos, los salones yenos de interesados al arte...
Desde dos anyos, la kriza ekonomika ke atako el mundo izo muncho danyo. Las galerias estranjeras estan refuzando de partisipar. Lo mas importante tambien es ke los koleksionarios no keren vinir a Turkiya.
Por konsekuensia, se diskutiya ay anyos ke el BIENALE organizado por “Istanbul Modern” i el fuar de Contemporary Art ke kontinua kon sukseso tambien, se devian de organizar en la mizma data, para azer profitar un mas grande evenimiento artistiko.
MARLBOROUGH GALLERY se desidio difisilmente a partisipar...
El rezultado es ke no es posivle de azer vinir los interesados por dos diferentes aktividades i Ali Gureli, i OYA i BÜLENT ECZACIBAŞI desidieron ke en el anyo 2017, el 12 Septembre, se avrira el fuar de CONTEMPORARY ART ISTANBUL, i el 13 Septembre 2017 el BIENAL empesara.
LA GRANDE INOVASION spesial de la fuar de este anyo:
Los amantes de arte van a pueder apresiar, el livro preparado ke se va yamar:
“Las Istorias de los Koleksionarios”.
La istoria de este muevo konsepto fue preparada por el koordinador, Doç. Dr. MARCUS GRAF.
60 koleksionarios de arte van a ekspozar sus ovras,120 ovras en total.
150-200 artistos van a ekspozar.
50 personas, jurnalistos, koleksionarios, estranjeros, fueron invitados a Estambol.
Los organizatores izieron sus posivle para organizar el fuar ke se avrira amanyana, kon partisipantes estranjeros i lokales.
Desde 11 anyos, lo mas agradavle para mozos, los artistos, es de ver partisipar muncha djente i entesarsen i kestionar para ambezarsen el arte moderno.
Para kada anyo mijorado!
