El livro ‘La Istoria de la Kuzina Turka Sefaradi’ ke era la tesis (tez) de graduasion (mezuniyet) de Sibel Cuniman Pinto en la Universitad Reims, tomo el treser premio, entre los premios de los Livros de Gurman del mundo.
Sibel Cuniman Pinto, despues ke tomo la formasion de kosinera (şef) en Cordon Bleu en Fransia, lavoro komo enstruktora en el mezmo lugar. Sibel fue envitada a konferensias en Turkiya, Ostria, Estonia, Alemania, Chipre (Kıbrıs), i Israel, i aparejo munchas organizasiones de envitasiones.
Sibel Cuniman Pinto izo sus estudios en Robert Kolej de Estanbol, i en la Universidad de Boğaziçi. Despues ke lavoro un sierto tiempo komo administradora en la seksion bankiera en Estanbol, marido i mujer fueron ovligados a ir a bivir en Italia, por razon del echo de su marido. En Italya, tomo kursos de komida, i empeso a entrodusir (tanıtmak) la Kuzina Turka en las organizasiones de mujeres.
En el anyo 2002, su marido tomo una propozision de echo en Paris, i de muevo, fueron ovligados de trokar paiz. Despues de tener una eksperiensia de dodje anyos en el sektor de bankas, Sibel entro al sektor de gastronomia. En primero, tomo la formasion de kosinera en Cordon Bleu, despues, entro a un programa de gastronomia i el arte de kuzina en la Universidad de Reims. Eskrivio ‘La Evolusion de la Kuzina Turka Sefaradi, la Aventura de Kinyetos Anyos’, i su tesis ke tomo el treser premio.
En Paris, durante ocho anyos, aparejo organizasiones de maksimum sinkuenta personas por grandes enstitusiones i firmas. En las aktividades de la Sezon Turka en Fransia, aparejo el kokteyl de aviertura de una ekspozision de la Banka Garanti. Tambien, akompanyaron un kokteyl de la Kuzina Sefaradi, aparejado en el Muzeo Turko por un Grupo de Muzika Ladino de Turkiya.
EL PROJEKTO KASHKARIKAS: KREAR DE NADA
‘Una de las karakteristikas de la Kuzina Sefaradi es krear de nada’ esta diziendo Sibel. ‘Por egzemplo, utilizar kashkaras. Anyos antes, aviya grandes famiyas, kaliya aparejar pransos por muncha djente, i aviya provedad. La mujer de kaza kaliya ke gizara por diez personas, i lo ke teniya en la kuzina, era solo 200 gramos de karne. Kon 200 gramos de karne, i dos kilos de prasa, aziya köftes de prasa. Es una de las komidas sembolikas de la kuzina sefaradi. Köftes de apyo, tambien. Lo de ariento de la kalavasa se meskla kon kezo i se aze ‘börek’, las kashkaras no se echan, kon un poko de asukar, un poko de limon, se apareja una komida sefaradi. Kon los nukleos (çekirdek) del karpuz, se aze marmelada. En la kozina de Anatolia ay komidas asemejantes ke se gizan kon sovrajes.
El objektivo del Projekto Kashkarikas es de entrodusir la kozina sefaradi i turka, tomando de baza esta filozofiya, i ambezar i ensenyar este tipo de komidas. Puede ser ke en la Asia, estan empleyando por gizado unas kozas del arroz, ke mozotros no konosemos’.
‘La primera envitasion vino de de un kosinero de Meksiko, por el Jenero del anyo 2017. La segunda envitasion vino de Brazil. Los Anjeles i Kanada estan en el programa tambien.
‘La primera etapa del projekto va ser ‘enformar’. A las vezes, va ser avierto al publiko, i a las vezes, va ser en forma de konferensias en las eskolas. La segunda etapa va ser aparejar un menu, lo mas kon komidas turkas i sefaradis, i komidas lokal. Vamos a dar i tomar reseftas, vamos a ambezar i ensenyar. Al final, vamos a lavorar kon eskolas, asosiasiones, i puede ser vamos a aparejar un dokumental o un livro.
La tresera etapa va ser una sena (akşam yemeği) grande. El presio va ser un poko alto, i lo ke vamos a ganar, se va ir al ‘Action Against Hunger’ (Movimiento Kontra la Ambre) kon ken estamos lavorando endjuntos. Para mi, esto va ser un projekto totalmente voluntario, va ser una responsabilidad sosial. Espero ke va pueder ir a munchos lugares.
***********************
