Bozes relijyozas djudias se enaltesen en la Amerika del Norte para afirmar la sakralidad de la vida de kada individuo, kual sea su orijen i kuala sea su kreensa relijyoza.
En los Estados Unidos, mas de 600 Rabinos i Hazanim sinyaron una petisyon afin de azer presyon sovre la administrasyon de Donald Trump konsernando la indeniavle importansa de kada “Ser umano” ansi ke sus derechos sivikos, teksto ke (segun lo ke entendi) dize aproksimativamente lo ke sige: “En muestra kualidad de Rabenos i Hazanim prometemos de syempre enalteser la boz afin de egzijir de la mueva administrasyon de Los Estados Unidos, de respektar en su totalidad “la dinyidad de kada persona ansi ke sus derechos” komo tambyen “las libertades sivikas de todos los puevlos en sus kualidad de kriansas pensantes, echas al imajen de Dyo”.
Ke es la verdadera sinyifikasyon de este mensaje? ke demandan estos grandes Relijyozos djudyos? Sin dubyo, ninguna favor espesyal al profito de sus korelijyonaryos. Eyos simplemente mos prevyenen ke ‘el prejuisyo de multiples payizes ultra-nasyonalistos oksidentales kontra los ke tyenen una kolor de kuero o varyas maneras de bivir differentes de las de sus propya populasyon’ puja poko a poko asta devenir una degradasyon progresiva de las verdaderas valores umanas.
A notar de muevo kon insistensya ke (komo dicho mas arriva) el prinsipal objetivo de esta petisyon no es partikularmente el destino de muestros ermanos relijyozos, ma de la totalidad de los ke no son fizikamente o espiritualmente semejantes a los myembros autentikos del payis.
Estos 600 ombres de Ley afirman ke (segun lo ke mos ambeza la istorya) los payizes ke golpean kualkyer puevlo de kolor diferente de la ke es la de sus puevlo, puedran tambyen, un dia en el futuro, golpear los ke son de otra kreensa o de otro ideal espiritual ke los suyos.
Durante la kampanya elektoral del ke fue eskojido komo prezidente de la mas grande potensya del mundo, el entonses avia prometido de fraguar altas paredes en la frontyera kon el Meksiko afin de impedir la entrada de los ke bushkan refujyo i mizmo de ekspulsar sin prealavle djuzgamyento tres milyones de vyejos migrantes ke ya se topan desde un largo tyempo instalados en el payis, ma sin papeles adekuados, pushandolos ansi en direksyon de un muevo destino insertano.
Es una verdad malorozamente difisil a desmentir ke, no solo en los Estados Unidos, ma tambyen en munchos otros Estados grandes o chikos evropeos, se remarka aktualmente este mizmo enserramyento sovre si mizmo, el kual es fatalmente portador de zenofobia i tambyen de antisemitizmo, dos fuentes de menospresyo i aboresimyento.
“Ama tu proksimo komo ti mizmo” disho un grande savyo djudyo de los tyempos pasados. Es ke esto es posivle? Puedeser si, ma muy raramente. “El egoismo” en su sinyifikasyon absoluta es uno de los elementos de baza del ombre, el kual la mas parte de vezes keda indiferente al otro ke si mizmo.
Ma esta vez, komo indirektamente mo lo sugjeran estos sheshentos relijyozos, deke no engancharmos a un esforso de perfeksyonamyento de lo ke semos? Deke no luchar kontra este mundo kaotiko ke es aktualmente el muestro, en empesando a gerreyar kontra muestra propya indiferensya por los otros? ’Este esforso sovre mozotros mizmos’ es puede ser la solo posivilidad de krear un mundo mas umano.
El grande eskritor franses, André Gide avia eskrito en uno de sus livros ke “el mundo no puedra ser salvado ke solamente de parte de los ke no se someten”.
Nunka mos sometermos ni kedar kayados delantre kualkyer indjustisya kontra ken ke sea, amigo o mizmo enemigo. Es una verdad ke solo la solidaridad entre las varyas kriansas umanas puede dar un senso a la vida.
