“Lo ke mos tyene endjuntos, es muestra Istorya, muestra Kultura, muestros amores i penas… Tambien son i muestras Fyestas…” Flory Jagoda
Munchos anyos antes la Era Kristiyana, Antiohus el Grande, Rey de Siriya, se apatroneyo de las tyerras de los Djudios. Portanto, les permetyo de pratikar sus Fey i konservar el Koen Agadol... En el reyno de su suksesor, el Rey Selescus, un djudio, Shimon, kijo ganar la simpatiya del Rey dizyendole ke un grande trezoro estava eskondido aryento del Templo Sakro... Alora akontesyo un evento ekstraordinaryo...
Este trezoro era destinado al mantenimyento de bivdas i guerfanos. Kon orden de Selescus, el jeneral Heliodor kijo tomar el trezoro malgrado la fuerte opozisyon del Koen Agadol. El jeneral se akometyo a entrar al Templo, ande pudiya entrar el grande relijyozo en Kipur, implorar el pardon divino para su puevlo... I esto, solamente despues de una perfekta purifikasyon ...
Apenas Heliodor entro al lugar Sakro, El Poder Divino se manifesto. Un kavalyero misteryozo, armado, salto ensima del jeneral, firyendolo i deshandolo medyo muerto sovre las lajas del Templo. El Koen Agadol imploro el Todo Poderozo de no matar el jeneral. Ansi, Heliodor iva pueder ir a su Rey i kontarle lo ke afito... Efektivamente, konto la terivle eksperyensa, adjustando: “Senyor, si dezeyash kastigar vuestros enemigos devesh mandarlos al Templo de Yerushalayim...”
Antiohus Epifanes IV, konosido en la istorya komo Antiohus el loko, paso al trono. Era orgolyozo de su kultura, tratando los djudios de barbaros i primitivos, kastigandolos sin piadad, forsandolos a abandonar sus Fey i pasar al Paganismo. Esta epoka era una perioda terivle para el Judaizmo. Syertos djudios, al empesijo tolerentes a la kultura elenistika, se rendyeron kuento del peligro de idolatrar Zeus. Los djudios kreentes orifiados, vyeron entre eyos, munchos prontos a la asimilasyon, abandonando los preseptos de la Tora.
Antiohus desidado a konvertir los djudios al Paganismo, un Shabat entro al Templo, destruyo, profano, sakeo i mato los kreentes kon el buto de instituir el Kulto de Jupiter. Los djudios ke refuzaron, fueron martirizados. Entre las viktimas ke preferaron la muerte al lugar del paganismo, los mas ilustros fueron el veneravle Elazar i Hanna kon sus 7 ijos...
El aedado Elazar era un grande savyo. Refuzo de komer karne de puerko, deklarando ke estava pronto a murir, por no pekar: “No kero dezonorar mi vejes. En muryendo fidel a mi D. esto deshando a mis dishiplos el egzempyo de una fidelidad a los komandamyentos de la Tora”. Hanna i sus 7 ijos fueron martirizados por la mizma razon. Esta famiya se aparyentava kon los Makabeos. La madre i los ijos konosyeron las mas terivles torturas, por no aver akseptado de enkorvarsen delantre Jupiter i aver refuzado komer la karne del sakrifisyo destinado a Zeus...
Matias, ijo del Koen Agadol Yohanan, dyo el primer sinyal de la revolta: “Ke me sigen los ke keren kedar fidel a D. i a su Fey...” Ansi dizyendo fuyo a las montanyas kon sus 5 ijos: Yonatan, Elazar, Yeuda, Yohanan, Shimon i nombrozos kreentes. Traversaron el pais, arrondjando las fuersas estranyeras, destruyendo las figuras de los idolos i establesyendo el Kulto de D. Yeuda, asigun la sava de su padre, kontinuo la lucha para la liberasyon, enkaveso las fuersas djudias. Desfio los jenerales de Antiohus en kampos de batalya i reusho a tomar Yerushalayim. Por empesar, purifiko el Templo Sakro profanado i establesyo el vero Kulto.
El Sanktuaryo fue reparado i konsakrado al Eternal, kon una dedikasa sublima ke turo 8 diyas. Estos aktos de grasya dyeron lugar a la fyesta de Hanuka ke selebramos lealmente desde siglos. Kon alegriya i konviksyon onoramos los eroes, martiryos ke pyedreron la vida para salvar el Judaizmo i glorifikar el nombre del Todo Poderozo.
Selebraremos Hanuka kon las luzes de la esperansa i estos versos de la kerida “Nonika”, de Flory: “Hanuka linda esta aki - Ocho kandelikas para mi”…
Desembre - 2016
