La semana vinidera se va fyestar Hanuka, en esperando ke el anyo 2017 va ser klaro komo las kandelas de la Hanukiya ke vamos a asender kon alegriya en muestras kazas kon todos djustos.
Hanuka es la fyesta de los Makabeos, fyesta sinyifikativa; porke mos aklaro sovre la gerra de los djudyos kontra los Siryanos.
Los djudyos eran un grupo de sivdadinos muy chiko en akel tyempo. Keriyan bivir kon sus tradisyones, sus maneras de vida, mizmo ke estavan menazados.
Sus mantenimyentos era la agrikultura, eran modestos, se kontentavan kon poko. Al lado del reynado siryano eran proves.
Antes ventidos syeklos, los siryanos aviyan okupado Israel i estavan penando a propajar la relijyon i las tradisyones gregas antiguas en esforsandosen de influensar los djudyos.
Munchos de los djudyos empesaron a imitar los gregos antiguos, vistyendosen komo eyos, tomando nombres gregos i otros kostumbres.
El Kohen Agadol ‘Matatia Ben Yohanan’ i los sinko ijos ke moravan en ‘Modiin’, i aparteniyan a la famiya de ‘Hashmonayim’ se opozaron a esta situasyon, i tomaron desizyon de gerrear para pueder kedar djudyos. Despues de tres anyos de gerra, los Makabeos ganaron i el Templo Sakro ke se estava utilizando fin a akel dia para las tradisyones de los gregos antiguos, paso a la mano de los djudyos.
Por akodrarmos de este evenemento se selebra la fyesta de Hanuka.
Hanuka sinyifika avyertura. Porke el Templo se aviya avrido de muevo en akel tyempo.
Hanuka es la fyesta de alegriya i de luz. En esta fyesta kemamos los mueve kandelares.
Los Makabeos aviyan topado un bokal de azete kasher, sin tokar kuando entraron al Templo. Este azete puediya kemar solo un dia, ma akontesyo un miraklo i la azete kontinuo a kemar ocho dias.
Yeuda ke era el ijo grande del haham Matatia, era el komandante de la armada. Le aviyan metido el nombre de ‘Makabi’ ke sinyifikava martiyo en ebreo.
La selebrasyon de la fyesta kontinua ocho dias.
Hanuka simboliza la Luz de la Libertad, de la Intelijensya, del Entendimyento, de la Djustisya i de la Razon.
El dover de una madre djudia es de aparejar la Hanukiya kon las kandelas kada dia, i kuando el ombre de kaza kon los ijos i ijas vyenen se aze la orasyon, se kanta todos endjuntos las kantikas i se kome burmuelos i dulsuryas.
El senso de las kandelas de la Hanukiya es:
La primera kandela es el simbolo del Dyo todo el Puederoso ke disho: ‘Ke la LUZ seyga’,
La sigunda kandela es el simbolo de la ‘TORA’,
La tresera kandela es el simbolo de la ‘DJUSTISYA’,
La kuatrena es el simbolo de la ‘PIADAD’,
La sinkena es el simbolo de la ‘SANTEDAD’(kutsallık),
La sejena es el simbolo de la ‘KERENSYA’,
La syetena es el simbolo de la ‘PASENSYA’,
La ochena es el simbolo del ‘KORAJE’.
El 24 del mez, Hanuka se va fyestar en el grande espasyo de Ortaköy, delantre la mar, kon el Hahambashi Rav Isak Haleva, kon el Presidente de la Komunidad Ishak Ibrahimzadeh, i kon el presidente de la munisipalidad Murat Haznedaroğlu komo el anyo pasado.
Veramente esta difisil de kreer ke en el pais ande estamos bivyendo tener koraje para azer este modo de evenemento en esta situasyon es el intrepido (korkusuzluk) del presidente de la komunidad.
Ke el Dyo no mos averguense (utandırmak) i ke seygamos syempre a delantre kon la kavesa alta mozotros los djudyos en todo modo de lugar en el mundo entero. Vos oguro una fyesta alegre, kon unyon i todos endjuntos, un avenir klaro, i ke la luz de la Hanukiya ke aklare muestros korasones, i ke mos trayga la pas en el mundo entero, AMEN.
HAG SAMEAH.
