İZEL, ke poseda una pluma perfekta, un esprito umoristiko i agradavle, fiesto los 25 anyos de su kariera el 5 de Desembre, 2016, en Schneidertempel, Estambol,
No fue muy fasil de aserkarme al artisto para azer sinyar su livro yamado “KARİKATÖR” i preguntar kestiones para mi artilolo. La afluensa de artistos, amigos, amantes de arte, era de no mankar de ver. Nasido en 1951 en Moda, Estambol, İzel sinyo tambien su livro: “MODA SEVGİLİM YENİDEN”.
Vos transmeto las repuestas de İzel. Me las embiyo desde Mumbai.
“Desde chiko, me enteresi a la karikatura. Mi famiya, i mas despues mis profesores, me enspiraron. Rapidamente, realizava sus portretos. Mis amigos me enkorajaron i ansi kontinuo...
Penso ke el “sentido de umor”, Esti, komo lo dizes, lo eredi de mi famiya. Es un poko jenetiko, kreyo. Era tambien un arma defensiva.
Los primeros tiempos, no me tomi al seriozo. La kontinuasion de la Aventura fue fasil.”
ME FASINO TU VERNISAJE! Si, me fasina tu pluma i tu esprito umoristiko.
Es un arte muy spesial de saver ekspozar. Kreates, si no me yerro, una atmosfera de kampos de konsentrasion?
“Esto muy kontente ke reushi a influensarte... Mi buto era realmente de pueder atirar los vijitadores i eksplikar la atmosfera dramatika, i la situasion de oy en diya. Las linyas koloradas, los files barbeles, murayas, ets.
Mozotros artistos sintimos mas ke otros.
Fui influensado por Ephraim Kishon, Marc Twain, Aziz Nesin, Haldun Taner.
Rengrasio a Şalom: Mis editores, Silvyo Ovadia, Yakup Barokas, İvo Molinas no mankaron de soportarme, i de desharme ekspresar en la platforma de la gazeta Şalom, desde mi primera karikatura ke fue publikado antes 25 anyos, en 1991.”
Regreto de no pueder sitar las performansas artistikas i kulturales interesantes i importantes.
Kreado por Plantu, karikaturisto de “LEMONDE; İzel Rozental es miembro del
CARTOONING FOR PEACE, desde 2006..
En el livro “KARİKATÖR” toman parte las alavasiones de: Plantu i Michel Kichka, renomados karikaturistos, amigos del talentuozo İzel Rozental, ke supo fraguar un ponte entre la Evropa i la Asia.
