Si, komo fue dicho la semana pasada: Poko despues la inolvidable desgrasya ke fue la Shoah, el livro de Jean-Paul Sartre ande el avia dicho ke “es la mirada del otro ke aze del djudyo, un djudyo” fue publikado en el anyo 1946 i obtuvo un inmenso sukseso de parte de sus amigos serkanos, partizanos i admiradores por la mas parte de orijen kristyana, tal Simone de Beauvoir i munchos otros intelektuales.
En esta data, Benny Levy era un ninyo de uno o dos anyos. El nasyo en 1945 en Ayifto, al seno de una famiya djudia mas o menos moderna, no praktikante i ansi manka de kualkyer ortodoksia relijyoza.
A la edad de ir a la eskola, el fue inskrito en uno de los mijores institutos fransezes del payis, del kual el fue ovligado de despartirse para segir sus paryentes en Beljika ande kumplio su edukasyon eskolarya antes de ir mas tadre en Fransya para sus estudyos universitaryos en la afamada “Ecole Normale Superieure” de Paris debasho la autoridad del profesor Louis Althauser, el kual lo apresyava muncho.
En estos anyos, en Fransya era la epoka de la grande influensa del “Komunizmo” sovre la manseves estudyantina.
Afin de mijor partisipar a esta atmosfera de revolta kontra ‘la burgezia empapada de rikeza’ i pueder libremente luchar kontra eya, Benny Levy ke era un apatrid sin ninguna karta de identidad, sintyo la absoluta nesesidad de obtener la nasyonalidad Franseza.
El direktor de la Eskola Normal Superyor “Robert Flaceliere” izo el mizmo la demanda nesesarya serka de Georges Pampidou (Prezidente entonses de la Republika Franseza) sin pueder resivir una repuesta pozitiva.
A notar ke este refuzo del Prezidente Georges Pampidu koinsidyo kon el periodo ke muncho mas tadre, Benny Levy el mizmo yamo: “indisyo de monstruozidad”.
En efekto era el tyempo ande sovre la demanda del profesor Louis Althuser, el avia empesado a aparejar un dosye de la totalidad de los lavores de Lenin, para dospues entrar: en primero en la ‘EC’ (Union des Etudiants Communistes) i mas tadre en 1966, en la “U.J.C.M.L.” (Union des Jeunesses Communistes Marxiste et Leniniste) grupo pro Maoisto, del kual Beny Levy el mizmo “debasho el psedonimo Pierre Victor” fue uno de los dirijentes, en el eskopo de trokar los ombres en lo ke tyenen de mas profundamente umano en eyos.
En mayo 1970, en Fransya, el grupo ekstremisto de la “Syedra Proletaryana” fue proibido i kon el tyempo ke pasava, muevas eksperyensas izyeron enfloreser muevas ideas i tambyen muevas aspirasyones en Benny Levy.
Ansi, kuando un dia, por azardo, un livro de Emmanuel Levinas le paso por la mano, esta ovra tuvo sovre Benny ke era kaji un ateisto, un poder de persuasyon tan fuerte ke lo pusho irrezistivlemente a meldar i konsakrarse enteramente al estudyo del Talmud.
Sus amigos dizian entonses ke Benny Levy avia pasado “de Mao a Moise” lo ke el rektifikava en deklarando: “No de Mao a Moise” ma “de Moise a Moise en pasando por Mao”.
Es en el anyo 1970, a la okazyon de la inogurasyon de la gazeta “Liberasyon” ke Benny Levy enkontro por la primera ves Jean-Paul Sartre abatido por dos golpes de paralizia ke lo avian deshado kaji syego, todo en guadrando su total lusides.
Un grande koryente de simpatia resiproka los aserko kaji immedyatamente i es grasyas a la intervensyon de Sartre serka del Prezidente Giscard d’Estaing ke Benny Levy pudo en fin obtener la nasyonalidad franseza.
Este primer enkontro fue el empesijo de una muy grande amistad entre los dos ombres. Impedido de pueder lavorar solo por kavza de su estado de salud ke avia apokado su vista asta no pueder meldar, el autor del livro entitolado “Reflexions sur la question Juive” demando a Benny Levy de ser su sekretaryo, lo ke el aksepto kon fervor i lo pusho a dizir ke Jean-Paul Sartre era para el “si no un padre, ma por seguro un ermano grande”.
Durante 7 anyos, los dos ombres tuvyeron largos kambyos de ideas i opinyones sovre varyos sujetos sosyo-filozofikos i ansi fue tambyen el kavzo del tema mayor de la ovra entitolada “Reflexions sur la question Juive” ande Jean-Paul Sartre avia eskrito ke “el djudyo es un ombre del kual la sola konsistensya es lo ke los otros ven en el”.
En esta sirkunstansya, la diskusyon fue larga entre eyos dos, asta pushar el selebre filozofo a dubyar i mizmo a revokar kon sinseridad lo ke el avia afirmado en este livro, fakto ke pusho los amigos del grande filozofo a pretender (sin tener razon) ke Benny Levy avia profitado del estado negativo de salud de Sartre para konvenserlo a akseptar su error.
A kontinuar...
