(I agora la esperansa)
Si, komo dicho en mi artikolo de la semana pasada, en el anyo 1973, Benny Levy devino el sekretaryo de Jean-Paul Sartre asta la data de su muerte en 1980, lo ke dyo a los dos ombres de letras la posibilidad de tener largas diskusyones no solo sovre el komunizmo, ma tambyen i prinsipalmente konsernando la mirada del grande filozofo franses sovre el djudaismo, konversasyones ke fueron publikadas de parte de Sartre (poko antes su muerte) en el byen konosido semanaryo “Le Nouvel Observateur”.
Tuve la oportunidad de topar en el sityo elektroniko Wikipedia una chika parte de estas diskusyones entre los dos ombres, ke dezeo komunikar a mis lektores si no integralmente ma a lo menos lo mas fidelmente posivle, afin de evitar todo modo de yerro posivle de entendimyento.
Ansi, diskutyendo sovre el destino del ombre djudyo i su rolo en la evolusyon de lo ke yamamos “sivilizasyon”, eyos disheron:
Jean-Paul Sartre – No te olvides ke uvo un shifro konsideravle de djudyos en el partido komunisto del anyo 1917, se puede mizmo afimar ke son eyos ke krearon la revolusyon.
Benny Levy - Yo te avlo del Ombre Djudyo, del ke kedo djudyo. El djudyo save ke el es amenazado kuando una muchidumbre se konsidera komo un puerpo mistiko. Grasyas a su eksperyensa, el no puede azer del plebeo (halk tabakası) una pura instansya de rezistensya; al kontraryo el puede azer la diferensya entre ‘lo ke vyene de la verdadera fraternidad en un movimyento revolusyonaryo’ i ‘lo ke vyene de amenazas terroristas mistikas’. Es ke esto no mos pusha a la sigyente konkluzyon? La eksperyensa djudia es esensyal (önemli) para refleshir de muevo sovre la revolusyon i kale konsiderarla en su totalidad. El ombre djudyo es doblemente konsernado por muestro problema. Por empesar a la baza de la idea revolusyonarya, el deve rekonoser, aun todas las perversyones, la idea mesyanika. I de otra parte, el se topa en los primeros rangos para sufriir de las perversyones de esta idea.
Un primer esforso es absolutamente nesesaryo: ‘Oir i entender esta idea en su sinyifikasyon propya i restorar su sinyifikasyon’.
Jean-Paul Sartre – Penso ke tyenes razon
Benny Levy: De este punto de vista la konjonktura aktual prezenta un peligro. Todo se pasa komo si un poko en kada lugar azen del mesianizmo la fuente de todas las desgrasyas, ma es ke se demandan lo ke era el mesianizmo ebraiko? No. La djente aze komo si savia… Es ke eyos van akseptar ke no saven i ke kale saver? Es ke se puede olvidar ke a la baza de la salvajeria anti-djudia se topa la inyoransa?
Jean-Paul Sartre - En la epoka ande eskrivi “Reflexions sur la question juive” el mesyanizmo era para mi una idea vazia de kualkyer sinyifikasyon. Si oy el tomo una grande sinyifikasyon es parsyalmente grasyas a muestras konversasyones ke me izyeron entender lo ke el es para ti.
Benny Levy: A la epoka ande publikates “Reflexions sur le question juive” tu avias pensado ke el “djudyo” era el rezultado de un invento del antisemito. En todo kavzo (para ti) no avia un pensamyento djudyo ni una istorya… oy trokates tu manera de pensar.
Jean-Paul Sartre: No, guadro esto komo una deskripsyon superfisyal del djudyo tal ke el es visto en el mundo kristyano kuando el es apanyado a kada kanton de kaleja por el antisemitizmo.
Por seguro ke el djudyo es viktima del antisemitizmo. Ma en este momento penso ke ay una realidad djudia mas leshos ke los danyos del anti-djudaizmo… Ay una realidad profunda del djudyo komo del kristyano. Kon razon, el djudyo se konsidera komo tenyendo un destino. (fin de sitasyon)
En la revista l’Arche, Antoine Spire dize: grasyas a las Edisyones Verdier, tenemos las ultimas palavras de Sartre durante los selebres interviews ke el akordo a Benny Levy, el kual fue indjustamente akulpado (de parte de Simone de Beauvoir i de munchos otros de sus amigos i admiradores) de aver abuzado de un ombre infirmo i muy ayedado. Portanto en sus ultimos anyos el grande filozofo fransez se akulpa personalmente de aver manifestado un pesimizmo egzajerado i de aver subestimado lo ke kale de esperansa para tomar la inisyativa de una aksyon.
Sartre dizia “la aksyon es esperansa” i eya (en su prinsipyo) no puede ser destinada al frakaso absoluto.
Ansi, de los dialogos entre J.P. Sartre i Benny Levy, sale por la primera vez una realidad djudia ke se topa mas leshos ke los danyos i frakasos del antisemitizmo.
