Pasar tiempo en kaza. Pasar tiempo kon las kreaturas. Azer viajes a los lugares sin pensar muncho. Tomar savor de la vida. Sierto kon lavorar. Kale ke tenga echo de azer una persona. Goethe, Tolstoy, Churchill, despues de los ochenta eskrivyeron bibliotekas yenos de livros. Picasso en los noventa, dayinda estava azyendo las pinturas maraviyozos.
Lo ke kero eksplikar es; bivir la vida un pokitiko avagar, ma, sin kedar vaziya. Sin kedar sin echo. Porke “Kuendo no tyenes echo de azer, sos vyejo.” dize el famozo Prof. Dr. Müftüoğlu. Antes sinkuenta anyos, kuando viniya una persona a los sesenta, diziyan “sesenta anyos es ke se eskapa la vida. Agora esta idea se troko. Aryento de 50-65 anyos semos mansevos viejos. 65-80 es medyo viejo. Despues de los 80 son viejos.
Ma otro modo… envezes estamos viendo perwsonas de trenta anyos; aryento de responsabilidad de ganar paras; de ganar la kapachidad sus ekonomikos, por eyos es esto; la primera responsabilidad de detenersen a la vida. Oras largas de lavorar. Viajes sin ver a la famiya tiempos. Ma komo un ayre pasa la vida; i les viene enfasio de todo… no kale vinir al grado de enfasio. Kale tomar la responsabilidad del tiempo ke es solo para mozos. Es ermozo de ver; ke se esta trokando las sezones, es ermozo kaminar debasho de la luvya, apartar el sol kayente, pizar al lodo, kaminar en el bodre de la mar. Engrandeser kreaturas i engrandeserse kon eyos. Kontar konsejikos a la kreatura i ambezar de muevo loke mos olvidimos. Empleyar, gizar para la famiya kozikas saludozas i asentarse a una meza, toda la famiya, i avlar avlar kontar del diya. Mashkar apoko apoko en la boka. Tomar savor de la komida. I esto todo azerlo kon lavoro. Todo kon una balansa. Demanyana ir al echo, i tomar savor del echo. I tornar a la famiya. Semejante i en los noventa.
El tiempo esta koryendo. La jenerasion mueva ke kere ganar del tiempo estan kon los komputeres o kon los telefones intelijentes. Estan nadando en el mundo dijital. Aya estan lavorando. Aya estan azyendo investigasyones. Aya estan azyendo munchos konosimientos. Ma se estan olvidando de bushkar a la amiga o amigo kerensyozos. Lentar la vida no es enteramente deshar la teknolojia mueva. Tomar las kozas menesterozos aryento de la vida, i saver tomar responsabilidad del tiempo ke es espesialmente para mozos. Kale saver dizir “shukur” (Grasias al Dio). Kale saver dizir “amen”. Kale saver fin a la ora ke vamos a serar esta pajina produsir en todo paso de la vida kon savor.
