Ke sera el destino de la Umanidad en este muevo anyo ande los akontesimyentos de los mezes pasados paresen predizir: angusya, dolyo i lagrimas?
En kual payis del mundo ke sea el espanto de un muevo golpe de terrorizmo oskurese el espasyo, i una kestyon ke puede ser konsiderada komo vazia de sinyifikasyon, mos vyene envezes al tino: “Es ke el progreso tekniko es syempre benefiko?” “Es ke la Umanidad (en su mayoria) esta pronta a emplear rasyonalmente lo ke la syensya le ofrese oy en dia?” “Es ke eya mijoreo su manera de pensar i no solamente sus kondisyones de vida?”
Un kavzo entre munchos otros ke se paso 10 mezes antes, ma ke fue djuzgado los primeros dias del muevo anyo koryente es: “El verdikto de kulpabilidad” ke el tribunal militaryo Israelyano pronunsyo el myerkoles 4/1/2017, konsernando el muy regretavle akto de un serjente djudyo nombrado Elor Azaria, el kual azia parte del ekipo sanitaryo de la armada Israelyana i ke (en Marso 2016) avia travado sin ninguna nesesidad sovre un agresor arabo, el kual despues de aver mortalmente atakado militaryos djudyos, se topava el mizmo terrivlemente ferido i ansi en la absoluta imposibilidad de azer un kualkyer otro djesto asasino.
Entonses inevitavlemente espunta una segunda kestyon: “Es ke en semejantes sirkunstansyas, kualkyer testigo ke ayega 10 puntos mas tadre al lugar ande se paso el drama, tyene personalmente el derecho de dar la muerte al enemigo ke se topa sin ninguna posibilidad de perpetrar una mueva agresyon?
Segun lo ke mos ambeza uno de los komentadores de este fakto, kuando los djuzgos militaryos djudyos le demandaron la razon por la kuala el avia travado sovre el matador arabo ke ya estava immovilizado por sus propyas feridas, Elor Azaria respondyo “vengar mis amigos”.
El rezultado de la “Sesyon Juridika militarya” del 4/1/2o17 fue (se entyende bien) “un verdikto de kulpabilidad” en desfavor de Elor Azaria, lo ke malorozamente okazyono una sisyon del puevlo ebreo.
De una parte, al interyor del aktual Governo el djuzgamyento en kestyon kavzo una atmosfera de total dezaprobasyon, kuando de otra parte en el partido adverso sosyalisto fue la kontentes de un djuzgamyento djusto.
Ansi en este momento, Israel se topa en estado de litijyo los unos kontra los otros. Kaji kada myembro del puevlo, kada gazetero komo tambyen kada intelektual interpreta el rezultado del procheso segun su propya opinyon.
Por egzempyo, tal ke fue dicho mas ariva los myembros del Governo aktual formado de reprezentantes de varyos partidos de la “Derecha” no solo protestaron kon vigor kontra el rezultado negativo del procheso, ma demandaron en favor de Elor Azaria, la intervensyon del Prezidente Reuven Rivlin, sola persona en el payis ke tyene el derecho de egzijir la induljensa de parte de kualkyer Tribunal.
Ma de otra vanda, los myembros del partido sosyalisto kaji en su totalidad felisitaron el Sistema juridiko Militaryo por su desizyon imprenyada de verdadero sentimyento de ekuidad.
De mezmo munchos shefes de komandamyento de la armada Israelyana ekspresaron sus satisfaksyon i insistyeron sovre ‘el dover de Umanizmo’ de kada soldado en funksyon.
Amishai Cohen, dekano de la fakultad de djustisya del “Ono Academic College” deklaro ke visto las provas kulpabilizantes en desfavor de Elor Azaria, la desizyon del Tribunal Militaryo era muy lojika i devia ser realizada.
De su parte, el profesor Asa Kasher ke partisipo a la redaksyon del ‘kodigo de Etika Militarya de Israel’ aplodisyo el verdikto de kulpabilidad por el akto de Elor Azaria, i konsidero “la severidad de la Korte de djustisya Militarya” komo una prova ke el sistema juridiko de la Armada ya funksyona byen.
Kual de los dos koryentes de opinyon tyene razon? Es ke una kriansa umana tyene el derecho de matar una otra kriansa umana (sea mizma enemiga) si eya no konstituye un reziko vital para los otros?
De muevo oy en dia, a la sigida de la Konferensya de Paris de la kuala la konkluzyon desplazyo a los myembros del governo Israelyano, munchos otros grandes ombres de sehel, refuzando el pesimizmo i sovre todo las ipotezis negativas ke obskuresen la atmosfera, prekonizan la valor de un verdadero esforso de Paz en akseptando la solusyon de Dos Estados el uno Israelyano el otro Palestinyano, lo ke asegurara la perenidad del puevlo djudyo en el mundo i sovre sus propyas tyerras.
