Tal ke es de uzo desde unos kuantos anyos, «Vyernes, el 27/1» sera un dia konsakrado a la memorya de muncho mas ke 6 milyones de ser umanos, viktimas del nazizmo si kontamos no solo los djudyos, ma tambyen (lo ke es una verdad ke no puedemos nyegar) los bohemyanos i otros desmazalados ke muryeron i eyos en kondisyones de krueldad i de inegualavle salvajeria.
Komo munchos de mis lektores ya lo saveran por seguro, en el anyo 2005, una plaka a la memorya de las viktimas del Olokosto fue metida en “el Konsilyo de la Evropa” de Strasburg, asosyada kon la ‘Deklarasyon de los Derechos i Libertades del Ombre’, kuala sea sus Fey, sus Orijen o la Kolor de sus kuero, lo ke en realidad mos aze rememorar los prinsipyos fundadores de lo ke sinyifika reelmente la palavra “Sivilizasyon”.
Es ansi ke “Las Nasyones Unidas” proklamaron el 27 Enero “Dia Internasyonal dedikado a la memorya de la totalidad de viktimas del orrivle jenosidyo ke se produzyo durante la segunda gerra mundyal’’.
Aun ke desde anyos i anyos este indesivle drama ya es komemorado kon fidelidad i dolor a una otra data en el mes de Mayo, no ay dubyo ke de mezmo Vyernes el 27 Enero de este anyo, todas las sinagogas del mundo komemoraran tambyen este Dia Universal dedikado a la reminisensya de la muerte salvaje de miles i miles de no-djudyos; orasyones seran echas, diskorsos seran pronunsyados i sera indeniavlemente kon las mizmas lagrimas en los ojos ke munchos de entre mozotros pensaran a la sufriensa de los ke (djudyos o no djudyos) fueron arrankados salvajemente a la vida, ansi ke a sus aspirasyones i proyektos a mitad kumplidos sin posibilidad de pueder realizarlos.
No se puede pensar ke en un semejante dia, un djudyo no se rememore lo ke fue la sufriensa no solo de los suyos, ma de la totalidad de estos ombres i mujeres amigos o enemigos ke fueron enserrados en espasyos estrechos ande la sola perspektiva era la ambre, la sed i la muerte.
Poko importa ke eya sea nombrada ‘Olokosto’, ‘Jenosidyo’ o ‘Shoah’, esta orrivle trajedia fue tambyen la mizma desgrasya para los bohemyanos, los impedidos (enfermos) ansi ke los ke tenian aspirasyones politikas diferentes. Eya fue la degradasyon de la umanidad en su totalidad kuando se save ke ninyos fueron arrankados de la pechadura de sus madres para ser mandados sin ezitasyon ni remorso a la muerte i ke munchas vezes entre los ke lo azian se topavan: intelektuales, filozofos i artistos sin ke ningun de entre eyos proteste o tenga la ozadia de revoltarse.
La verdadera sivilizasyon no es un ovraje monolitiko echo de un solo pedaso, eya es echa de esforsos perpetuales de miles i miles de personas ke oyen, pensan i lavoran puede ser kada una a su manera, ma ke nunka refuzan sin razon imperativa de oir lo ke los otros pensan i dizen.
Un grande eskritor del kual no me akodro el nombre tyene eskrito “no me demando kuando vo murir, ma solo lo ke puedo azer mientras ke esto en vida”.
Si, ay muncho de azer tanto ke estamos bivos, muncho a korijir i trokar en mozotros mizmos, ‘muncho dar’ i de mezmo ‘muncho saver resivir’.
Komo dizen los grandes pensadores, para la kriansa umana bivir realmente es no ser limitado a si solo, bivir realmente es ir mas leshos ke si mizmo i dirijirse en direksyon del otro, oyirlo, ayudarlo, avlar kon el i partikolarmente dezear enrikesermos i enrikeserlo no solo materyalmente ma moralmente afin de estableser kon el un dialogo ke sera un djenero de perpetual ‘dar i resivir’ espiritual.
