Los dos Aniversarios de Nedim Saban

Fue una suerte de ser invitados a la reprezentasion, una festivita, una nochada inolvidavle de demonstrasion artistika, el 16 de Enero, 2017.

Resivimos kon palmas NEDİM SABAN, asentados en el salon reputado de Estambol, el teatro de “Kenterler”, yeno de djente ke vinieron a felisitar el kerido Nedim Saban, ke fiesto los 50 anyos de su egzistensia i 35 anyos de kariera artistika.

Nedim suvyo en la shena para rengrasiar sus parientes, i sin olvidar, nombro mizmo a sus kerensiozos bisavuelos i bisavuelas respektuozamente. Despues de mas de dos oras, mos yevo a sembrar la nostaljia i yamo a la shena sus parientes, kolegas, amigos de eskola, ets. Todos kontaron sus suvenires i alavaron muestro kerido Nedim...

Estuvieron prezentes i suvieron en shena tambien los reputados aktores del teatro Turko: Ali Poyrazoğlu, Demet Akbağ, Gencay Gürün, Suna Keskin, Göksel Kortay, Cem Davran, Armağan Çaglayan, Metin Zakoğlu.

“Antes 50 anyos, a las 7.30 mi kerida madre estava okupada. Djusto en este momento? Por ke me metio al mundo en 1976...” Mos konto umoristikamente su vida asta oy. Mos izo riir en mostrandomos fotografias i videos konsernando sus nombrozos premios ganados a partir de 1976, de kuando gano el premio de UNICEF kon una piesa infantil ke avia eskrito a los 9 anyos.

Despues del Liseo Robert College, estudio teatro, sinema i televizion en los Estados Unidos (New York University). Gano una burs (beka) kon su teza sovre: Les Bonnes de Jean Genet i Ghosts (Gengangere) de Henrik Ibsen.

Keriya prezentarvos el senario de “Black Butterfly” ke me plaze muncho, ke fue finalisto en Ingletierra i gano el konkurso “Euroscript” antes anyos. Ma no kavio en un tan chiko lugar.

A kontinuar…