Dia Enternasional del Rekuerdo del Olokosto, es un dia komemorativo enternasional, el 27 de Enero, el dia fiksado para komemorar las viktimas del Olokostı. Akel dia, se komemora el jenosido ke izieron los nazis, i ke rezulto en la muerte de 6 miliones de judios, 2 miliones de zinganos, 250.000 personas kon diskapasidad (engelli), i 9.000 omoseksuales. Esta data fue fiksada por la Asamblea Jeneral de las Nasiones Unidas. La komemorasion tomo lugar por la primera vez, el 24 de Enero del anyo 2005, i se komemoro el sesentien aniversario de la liberasion de los kampos de konsentrasion nazis, i la fin del Olokosto.
El 27 de Enero de 1945, Auschwitz-Birkenau, el mas grande kampo de konsentrasion, fue liberado por las tropas sovietikas.
El tema prinsipal del 72. aniversario va ser el “Tiempo”, sembolizando una ora, ke se topo en la kamara de gaz i el krematorio, en los lavoros arkeolojikos del anyo 1967. “El tiempo mos alesha de la istoria de Auschwitz. La memoria es siempre una lucha (mücadele) kon el tiempo. Kon tiempo, las jenerasiones suksesivas se pueden olvidar del Olokosto. La memoria kale ke este vivante, por ke los mansevos no se olviden los peligros (tehlike) del populizmo, el ekstremismo, el rasizmo, la zenofobia, el nasionalizmo, i el antisemitizmo”- disho el Dr. Piotr M.A Cywinski, direktor del Muzeo de Auschwitz.
En la komemorasion del anyo 2016, el dirijente del Kongreso Judio Evropeo, Prezidente Juncker disho: “Nunka mas! Esta fue la promesa de muestros padres despues de la Shoah. Devemos de defender la demokrasia, i los derechos esansieles en muestros Tratados (antlaşma). Estas valores son la baza de muestra Union, i de muestras enstitusiones. Dingunos no mos da estas valores en la mano. Devemos de defenderlas kada diya, espesialmente en los tiempos difisiles”.
En el mezmo dia, el Prezidente Juncker avlo por las aksiones ke la Komision deve de tomar para kombatir (mücadele etmek) el rasizmo, la zenofobia, i el ekstremizmo, en utilizando la justisia kriminal. Devemos de kriminalizar tambien la inyegasion (inkar) del Olokosto. Solo 13 de los 28 Estados miembros estan realizando esto. La Komision esta envitando los miembros Estados a unirsen. Las atakas kontra las sinagogas i las eskolas judias estan pujando de dia en dia, komo tambien las atakas a los ombres ke yevan la kipa en el publiko. Los atakes kontra los judios i las otras minoridades mos estan amostrando ke devemos de defender las valores de la Union Evropea, ke son el respekto de la vida, los derechos esansieles, i las libertades.
Kada anyo, en Israel, el 27 de Enero, a las diez de demanyana, una sirena de dos puntos marka el empesijo del diya de Yom HaShoah. Los israelianos, en el pais entero, deshan sus echos por un momento de silensio, por la memoria de los sesh miliones de judios, eksterminados por los Nazis, en el Olokosto. Los konduktores i las personas se aretan en medio de la kaye.
En la Knesset, los nombres de las viktimas se melda una por una. Se mete rozas delantre del monumento del ‘Revolto del Ghetto de Warsaw’, en Yad Vashem. Una noche antes, seremonias nasionales se azen en Yad Vahem. Un sorvivente asiende la flama del Olokosto. Sesh kandelas se asienden por la memoria de los sesh miliones.
