Komo previsto, Vyernes pasado, en las tinyevlas del chaos ande el mundo parese undirse en este momento, “la komemorasyon” de los anyos trajikos no solo de la Shoah, ma tambyen de los suplisyos inflijidos a nombrozos otros individuos (tal por egzempyo, los bohemyanos, los komunistos i los infermos konsiderados de parte de la Almanya komo personas inferyores ke no tyenen el derecho de bivir) parese komo el kumplimyento de un dover imperyozo de ermandad en direksyon de todas las viktimas.
Si, ‘este esforso de muestra memorya afin de nunka olvidarmos’ fue komo si kada ser umano tomo konsyensya de la devda no solo de solidaridad ma tambyen de remembransa ke le inkumbe, afin ke la sufriensa indjusta ke fue inflijida en akeyos tyempos a miles i miles de inosentes djudyos o no djudyos, pueda salir de la orrivle oskuridad del olvido.
Mas de ochenta i sinko anyos despues de la fin de la segunda gerra mundyal i de la salvaje eksterminasyon de milyones de djudyos i otras viktimas, una grande kuantidad de responsavles de la muerte de inosentes, biven malorozamente syempre libres. “Efraim Zuroff”, aktual direktor del Sentro ‘Simon Wiezental’ en Yerushalayim, el kual es konsiderado komo uno de los mas aktivos persegidores de los inyovles responsavles de la muerte de nombrozos inosentes, mos ambeza ke diferentes payizes evropeos tal la Suede, la Norveje i otros, refuzan syempre de bushkar i kastigar ‘los individuos de sus puevlo’ kulpavles de aver partisipado al impardonavle krimen de eksterminasyon umana.
Por kontra la Almanya aktual i otros payizes evropeos modifikaron nombrozas reglas de sus kodigo penal a este sujeto afin de render posivle la persekusyon de los ke akseptaron de kolavorar kon los nazis en varyos kavzos i kontinuan syempre a ser vijilentes afin de pueder venser este odyo munchas vezes inkomprensivle kontra el djudaizmo i kualkyer otra relijyon ahuera la de sus propyo payis.
Esta persistensya del antisemitizmo en kaji todos los payizes del mundo, ahuera byen entendido de Israel, aze el objekto de nombrozas investigasyones de varyos intelektuales kosmopolitos. Ke lo yamen ‘antisemitizmo’, ‘antisionizmo’ o ‘antidjudaizmo’, todos savemos ke esta evidente voluntad de absolutamente arrebashar i erradikar el djudaizmo tyene syempre el mezmo manadero, el kual es “el selo por esta obstinasyon de un punyado de ombres i mujeres sin tyerra ni verdadera morada, los kualos se obstinaron durante 2000 anyos a tener komo solo abrigo “la Ley de sus padres”.
Es difisil de afirmar la epoka egzakta i los varyos faktores ke se topan a la baza de este eternal aboresimyento ke parese kontinualmente evoluar kon los anyos. Unos kuantos istoryanos pretenden sin pueder afirmar ke esta inimistad pudo empesar en el antiguo Ayifto de ande una chika kuantidad de sitizanos i esklavos fuyo para segir Moshe Rabenu en el dezyerto. Munchos otros savyos atribuen la aparisyon del verdadero antisemitizmo a la epoka del empesijo del Kristyanizmo i partikolarmente del refuzo de akseptar la mueva relijyon de parte de los ebreos atados unikamente a la Tora i a este livro sakro ke es la Biblia.
En todo kavzo, los siglos ande el antisemitizmo se afirmo lo mas en la Evropa, fueron (syempre segun munchos espesyalistos) el ‘dyes i mueven siglo’ i ‘la primera mitad del venten siglo’, epoka ande aparesyeron nombrozos grandes pensadores i syentifikos djudyos ke afirmaron sus superyoridad intelektual sovre munchos otoktones.
Revinyendo al sujeto inisyal de este artikolo, Djueves pasado la prezidente de la Unyon Evropea “Frederika Mogheni” afirmo ke ‘el mundo tyene la responsavilidad de no olvidar los milyones de djudyos i de otros ke fueron asasinados durante la segunda gerra mundyal’. Eya tambyen adjunto: ‘Devemos tener las orejas i los ojos avyertos delantre la aktual rekrudesensya del rasizmo i syempre akodrarmos del Jenosidyo perpetrado sovre las tyerras del kontinente Evropeo’…. “Tener la Evropa unida es la sola manera de garantizar ke mas nunka este djenero de trajedia no se repetera en los tyempos futuros”.
Komo lo disho el defundo Prezidente Israelyano Shimon Peres “Semos los ojos de las viktimas ke se akodran, i tambyen sus bozes ke gritan de espanto i de dolor”.
