Ay unas personas ke trayen diferensias, o un movimyento diferente al mundo, komo Massimo Bouttura ke es uno de estas personas. Massimo Bouttura es un shef de restorante Italiano en Modena (Italy) ke gano tres estreyas de Michelin.
Kuando empeso los aparejamientos en Brasil para las Olimpiadas de 2016 Rio, el puevlo ampeso a debatir. El puevlo estava prove aryento de una kriz finansiaria. El koste de las Olimpiadas trusho protestos al governo. Shef Massimo Bouttura i el shef Brasiliano Davit Hertz i un groupo de shefes ke estavan gizando para los atletikos en el kazal ke vieron la desgrasia del puevlo izyeron un proyekto de los sovrajes ke estavan gizando. Kitaron unas komidas maraviyozas, i las prezentaron a los proves en los mas luksos restorantes sin tomar un grosh, i esta djente prove ke se sintieron komo prenses. Bouttura disho ke esta idea le vino al tino en la ekspozisyon de Milano ke tenia el tema “Alimentar al Mundo i no Konsumir.” El dize, “kale ke tornemos a las kostumbres de muestros abuelos. Kale ke gerreemos kon el konsumir en vaziyo”.
En esta kestyon ke meldi, despues me vino al tino, la eskritora muestra Sibel C. Pinto. Eya tuvo la mizma idea kon el proyekto “Action Kashkarikas”. Sibel C. Pinto tyene el sitio de web ande esta lansando esta idea al mundo. “STOP! It’s not trash, it’s today’s meal!” - (STOP! Esto no es sierkol, es la komida de oy!)
Eya esta amostrando al mundo ke las kashkaras de los legumbres ke estamos echando al sierkol no son chopes. Se puede gizarse kozas savrozas kon estos. I ke ay kuantos milyones de ambiyertos en el mundo. I kuantos milyones de personas ke son obezes.
Si pensash el tema prinsipal de estos shefes es tornaremos a las kostumbres de muestros abuelos. I yo digo, si miramos al gizado de los sefaradis, es esto. En todo modo de komida ay un poko de sevoya, un poko de tomat, un poko de karne, i se mete lo ke ay en kaza de legumes o pulses (bakliyat) i se giza una kaldera kon kaldiko savrozo a la famiya grande. I Sibel C. Pinto, en la ekspozisyon de 2017, en Mexico izo la komida savroza kashkarikas ke enverano kaji kada semana se giza en los mupakes de los sefaradis de Estambol.
En la televizyon ay kada ora programes de gizados. El mundo se izo global, i los gizados fuzyon. I los mansevos agora no tyenen menester de demandar. Estan bushkando en el YouTube la komida ke keren i aya la estan topando. Ma mozotros semos ovligados de amostrar ke el gizado sefaradi es saludozo, es ekonomiko, es savrozo. Mezas de alegrias ke metash syempre kon abundansya (bolluk, bereket).
