Komo es kaji syempre lo mezmo en semejantes kavzos, la muerte de dos personas de valor relativamente mansevas ke personalmente konosi, la una de muy muy serka syendo la mujer de mi ijo, la otra durante aktividades sosyales en su kualidad, a un syerto momento, de Prezidente de la Matan Baseter, me desho en estado de profundo desmamparo.
Ay de esto unos kuantos dias, aun los inmensos esforsos de su marido i el amor de sus ijos ansi ke de todos sus serkanos, mi ermuera Bronislava Davidovich Perahia serro por syempre sus ojos despues tres anyos i medyo de terrivles sufriensas, durante los kualos eya resivyo mas de sinko intervensyones shirurjikales i inombravles sesyones de kemoterapia ke la deshavan no solo desfuersada ma literalmente abatida de dolor.
Su agonia fue larga i muy penivle i ansi fue de mezmo la afliksyon de su marido ansi ke de sus ijos, ermana, ermanos i mozotros otros ke la konosiamos de muy serka i ke fuimos testigos de su valor komo tambyen de su martiryo durante los ultimos dias de su vida.
Muestras relasyones fueron syempre muy kerensyozas lo ke me permetia de diskutir libremente kon eya sovre varyos sujetos; eramos muncho mas amigas ke ermuera i esuegra.
En su kualidad de profesora de ‘literatura’’ i ‘preseptos filozofikos’ de la klasa terminal de un Liseo Franses ande los elevos eran en mayoria de orijen asiatika, eya tenia nesesaryamente una kultura literarya muy ancha i una profunda komprensyon de los estudyantes.
Devo konfesar ke personalmente me ambezi muncho de eya, komo eya se ambezo tambyen chikas kozas de mi. Teniamos abitualmente largas diskusyones sovre varyos sujetos, kambyos de ideas durante los kualos kada una de entre mozotros se esforsava de entender realmente lo ke la otra dizia.
Dos dias dospues la muerte de mi ermuera, me ambezi tambyen kon grande tristesa, la doloroza dezaparisyon de muestro kerido korelijyonaryo, Robert Filiba, ke personalmente tuve la okazyon de konoser i apresyar de muy serka.
El izo parte de varyas institusyones de la Komunidad Djudia de Estambol i ansi, syendo jeneralmente muy performante en sus varyas aktividades, el partisipo a la evolusyon sosyal i intelektual de munchos de muestros ermanos.
Ay de esto unos kuantos anyos, el fue prezidente de la “Matan Baseter”, ovra karitativa de la kuala yo era una de los myembros mas o menos aktivos… Tuve ansi la okazyon de konoserlo de muy serka i ansi de apresyar “la profundura de sus opinyones i la sagasidad de su manera de pensar i refleshir”.
Era la epoka ande la ovra en kestyon era finansyeramente kaji enteramente dependyente del budjeto de la “Grande Komunidad Djudia” de Galata, a la kuala por seguro la Matan Baseter devia regolarmente dar kuento. Ansi una partida de los myembros (ke avian asumido la karga de no salir mas leshos kel montante fiksado) luchava en este objetivo, myentras ke de otra parte los ke a lo manko una vez a la semana vijitavan los menesterozos en sus morada, realizavan kon mas intensidad todo lo ke les mankava…. Por esta razon, en kaji kada seduta ebdomadarya, aun la grande amistad ke mos atava los unos a los otros, avia perpetualmente grandes diskusyones. I kaji syempre Robert Filiba kon su kalmo abitual pushava kon ‘sehel’ i ‘pasensya’ los kombatantes a eskojer una solusyon medyana apropyada al kavzo.
Konosi tambyen su mujer ke es de una grande valor intelektual … I sovre todo konosi de serka su madre Silvya Filiba, persona eksepsyonal a la kuala munchas de muestras konsivdadinas deven sus konosensya de la lingua ebraika i de lo ke reelmente es ‘la maravioza Etika del djudaizmo’.
Partajo la tristeza de todos los serkanos del defundo Robert Filiba a los kualos auguro pasensya… komo (se entyende byen) partisipo absolutamente al dolyo ande se topan: mi ijo, mis inyetos ansi ke la totalidad de las famiyas Davidovich i Perahya.
Ninguno de entre mozotros es immortal, todos (chikos komo grandes) savemos ke es solo por una parsela de tyempo ke mos topamos sovre la tyerra ke en este momento es la muestra. Kualos sean muestros esforsos o muestra revolta ‘la fin de la vida umana’ es una realidad ineluktavle. A kada uno de deshar chikas o grandes provas pozitivas de su pasaje.
P.S. Agradesko sinseramente todos los ke (kon sus prezensya, golpes de telefon, e-mailes i kartas karitativas de byenfezensya) partisiparon a mi grande tristeza.
