En el mez de Febrero ize un viaje chiko a Israel para ver a mi sovrina ande esta estudiando, Hebrew Universidad. Kaji kada anyo me vo para respirar el aver, i ver un poko a las amigas o amigos i a la famiya. Aki, vos kero kontar unas kozas enteresantes. No vos va kontar de los lugares famozos turistikos. Kero kontar unos detalyos chikos. Ya la vide a mi sovrina ke esta muy kontente de meldar aya, i tyene alrededor frekuentisiminyentos de akademikos i estudiantes alavados de todo el mundo. Mi sovrina Eslin Benhabip mos amostro los kampos de la Universidad, las klasas ande estan meldando, la biblioteka ke kontiene aryento miliyones de livros i arshives famozos. Esta universidad ke se fundo en 1918 es ke kontiene la biblioteka mas ancha en el mundo kon los livros enriva de Jewish Studies. Las guertas del kampus, ande estan los elevos, todos riyendo i orozos. Entrimos a la synagoga de la Universidad ke tiene una arkitektura muy enteresante. El nombre es “The Hecht Synagogue”. Una sinagoga chika, ma esta travando la atansyon kon la vista del Ehal Akodesh. El arkitekto Israeli Ram Karmi, lo konstruyo (29 Enero 1981) a la vista de Beth Amikdash. Tyene una ventana muy grande ke esta vyendo entera la vista de Beth Amikdash. Allado de la ventana, en las dos paredes tyene un lugar chiko para meter las Sefer Toras. La teva mira a la ventana. Los koltukes todos en redondo mirando a la ventana. Las paredes de aryento son de piedra de Yerushalayim. La azara, enriva de la galeria. Dizen ke la sinagoga no esta avyerta en los Shabates o en las fiestas relijiozos. Porke la sinagoga es aryento de la Universidad. I en estos dias la Universita, me parese ke esta serrada.
Al otro diya kaminimos en los tuneles de abasho de Beth Amikdash. Otro diya suvimos a la montanya de Masada. Israel tiene un klima seko. La tierra syempre es seka. No kaye muncha luvya. Syempre tuvo esta gerra para mantenerse kon poko agua. Antes del Kristo i agora. Syempre i syempre. Syempre se esforsaron para topar remedio a la sekura. Depasho del Bet Amikdash ay sisternas de agua muy enterasantes. Komo se esta arekojiendo la agua? Muy enterasante de oyir de la giya. Al mismo tiempo, las paredes de Yerushalayim ke no son duz i enriva vemos unos burakos kaji 13x13 santimetros es para apanyar a la luvya, i kedar umido (nemli). Afilu Masada. Una montanya enriva del dezierto (çöl). Aya ay tres o kuatro palasios. Sinagoga. Mikve. Merkansias. Banyos. En esta montanya, en el tiempo del rey Herod (B.C 1) izieron un sistema de agua maraviyoza. La luvya esta abashando a la montanya. Izyeron kaminos para la agua, afilu barajes para trokar el kamino de la agua. I la agua se esta inchendo en las sisternas ke son dodje deyas. Kaji 40.000 metros kubes se estan inchendo. Tienen banyos rituel. Se esta enkantando la persona de ver esto todo enriva de una tierra debasho del sol komo se estan mantenyendo. Afilu oy ande estas kaminando en Israel, estas viendo arvoles. Estas viendo ke el puevlo esta sembrando la tierra. La teknolojia de agua, esta dando la agua a la tierra el karar ke ay menester. No una damlayika demaziya. Todo kon menester. En las eskolas, a las kreaturas estan ambezando de chikes ke la agua es muy emportante para bivir i ke Israel es prove de agua.
Dospues me fui ande mi amiga de chikes ke ay anyos ke no la viya. Mora en el Moshav Tzur Moshe. Un lugar chiko ma ay de kontar kozikas enteresantes. Otra ves. Afilu aya, estan sembrando frezas. Dulses. Savrozas. I aya estas viendo komo estan dando la agua kon unos buris delgados delgados, ke estan enriva de la tierra, i esta vinyendo la agua a gotas a gotas.
Kuando meldava en la lise, la profesora de literatura mos ambezava mil vezes ke mirar kon ver no es lo mizmo. Aze atansyon ke solo mirar no keda en el tino. Kale toda koza mirar i ver. Mil vezes, si me vo a viajar a un lugar, kada ves va topar una koza ke me esta vinyendo agora enteresante.
