Oy kero partajar kon vozotros keridos lektores; una jurnalista i eskrivana ke se yama Tuluhan Tekelioğlu ke izo su sejen dokumental (belgesel) sovre el sujeto de la mujer i ke el moto es ‘Puedes Azer’ (yapabilirsin).
Ampeso a avlar en dizyendo, “En estos dias ke tenemos menester de muncha esperansa (umut), kije infundir (aşılamak) el optimismo a las personas.
Este projeto se puediya azer solamente kon las mujeres. Porke “Si ay mujer, no ay imposible” (kadın varsa, imkansız yoktur).
Kije kontarvos ke kuando el optimismo se rankontra kon el koraje, se puede ver munchas reushidades en todo modo de espasyo.
Entonses me rankontri kon una mujer ke kreo la ‘Asosyasyon de Empresarios de Mujeres’ (Kadın Girişimciler Derneği kurucusu) i kije mostrar en este dokumental la situasyon de las mujeres.
Las karakteristikas komunes (ortak) de estas mujeres son ke todas lucharon kontra las difikultades de sus vidas. Nunka no son pesimistas, al kontraryo todas estan muy alegres, i muy stabiles.
Eyas reusheron sin pelearsen kon el den frente, todas muy laboryozas, se estan kreyendo a la fuersa de la solidaridad (dayanışma) ke tyenen entre eyos.
La solidaridad de las mujeres es un konsepto ke ya mos olvidimos espesyalamente en esta vida de kompetisyon (rekabet).
En la Turkiya lo ke devemos de azer en primero sovre los derechos de la mujer es ambezar la kerensya a las personas. Para ke la mujer reushka, kero dizirles “por lo ke krees kale azer el primer paso”. La esperansa es la persona mizma. Puedemos krear i azer munchas kozas. Es un dokumental de la umanidad (insanlık), ke tyene por buto de propajar la esperansa.
Una manseva ke es pilota del avion F-16, otra avokata ke su madre paryo 9 ijas i torno de la muerte para pueder parir un ijo. Esta mujer kijo dar al padre el guste de todo lo ke aspera de un ijo.
Otra ke mora en un kazal de Smyrna (İzmir), para pueder azer konoser este kazal, desino fotografias en las paredes de las kazas del kazal, i despues disho ke va pintar (boyamak) toda la Turkiya.
Otra ke se puede dizir manseva gano dos vezes el rekor del mundo, en el spor de halter ke es un spor konosido de los ombres en puedyendo alevantar tres vezes mas muncho de lo ke peza. Todos i su famiya se kreyeron ke puede ganar…
“Nunka renunsio” (asla pes etmem) disho una mujer ke es enjenyora de alimentos (gıda mühendisi)… Para enforteser la immunidad (bağışıklık) de su ijo hazino tuvo menester de la leche de la bizba (arı). No aviya en Turkiya esta leche. Eya reusho a produzirla en su pais.
Otra mujer ke bive en Kars, una sivdad en Turkiya, ande las personas son mas o menos atrazados i no deshan a las ijas bivir una vida normal, rezistyo i nunka no desho trespizar (ezdirmek) sus ijas i les permetyo de lavorar para pueder ayudar a sus maridos en el punto de vista ekonomiko.
Una dramaturga (oyun yazarı), direktrisa (yönetmen) gano en el festival de filmo en New York el premyo (ödül), de la ‘Mijor Artista de Mujeres’ (en iyi kadın oyuncu) ke 30.000 personas vyeron este filmo. En primero tomo la permisyon de la madre de su marido porke eya dirijava todo. Kuando eya le permetyo el marido no avlo nada. Agora todos tyenen konfiensa en eyos.
De todos estos egzempios puedemos ver, ke las mujeres si keren una koza de aryento de sus korasones, no ay safek ke no reushkan.
Kerer es azer…
Kero terminar kon una frase (deyiş) de Mahatma Gandhi: “En primero deves de ser tu misma, del trokamyento ke keres ver en el mundo.”
(Dünyada görmek istediğin değişimin kendisi sen ol…)
