Esta semana muestra kerida Klara, ke no mos manke, no pudo eskrivir porke esta okupada. Ya se ke eya lo mas vos eskrive artikolos politikos ma yo no vos va eskrivir sovre la politika porke la verdad dizirvos no me interesa muncho. Al lugar de politika yo kero kontarvos sovre un filmo ke me impresiono muncho. Me aviyan alavado este filmo i yo la otra noche me meti a verlo. De verdad ke me impresiono tanto ke noche entera lo vide en mis es.huenyos!
El filmo pasa en los anyos ‘60 en los Estados Unidos en Virginia, donde ainda aviya diskriminasion entre los blankos i los pretos. Ver el nivel de la diskriminasion dainda solo antes unas kuantas dekadas me shoko profundamente. Ver a la djente blanka mirar a los pretos komo si no eran seres umanos, no kerer estudiar o mizmo komer en el mizmo lugar ke eyos, krear problemas para eyos si los topan solos en la kaye, esto todo me shoko muncho i me revolti kontra este modo de tratamiento de personas.
La istoria es una istoria reel sovre tres mujeres pretas ke eran tan intelijentes i kapaches ke aviyan sido eskojidas para lavorar en NASA komo bazikamente komputadoras. Una de eyas era tan avansada en matematikas ke fue transferada al departamento de “espasio” ke estava lavorando para embiyar un ombre al espasio. Los Rusos aviyan reushido a azerlo ma los Amerikanos no i se estavan selando de los Rusos i tambien se estavan espantando ke kon este program ke aviya reushido ande eyos, los Rusos puedian atakar a los Amerikanos.
Esta mujer preta intelijente sufriyo las del Paro los primeros tiempos ke estava lavorando en este departamento ke konsistiya enteramente de ombres. Ya vos puedesh imajinar komo la miravan estos todos ombres ke por primera vez vieron una mujer i preta (!) entrar a sus departamento komo kolega i eksperta en sus sujetos! Dingunos no kerian avlarle, dingunos no kerian kerer ke eya era mas kapachi de eyos i siguro ke no se komportaron buenos kon eya. Mizmo les deranjo ke eya tomo kafe de la makina de kafe ke aparteniya al departamento. El dia sigiente le metieron una chika kafetiera ke no lavorava i eskrivyeron “Colored” (para los de kolor) ensima. En esto todo lo mas difisil fue para esta mujerika de ir a la tualet. En el edifisio ande eya estava lavorando no aviya tualetes para mujeres pretas! Eya devia de korrer kaji un kilometro al solo edifisio ande aviya tualet para mujeres pretas, pishar i korrer atras otrun kilometro. El direktor del departamento ke no tenia haber de nada de lo ke estava pasando, un dia le demando porke se estava absentando durante 40 minutos unas kuantas vezes al dia. Eya en gritando le disho sovre las tualetes i el kafe. El direktor ke se rendio kuento de las kozas en un periodo del mundo ke se estava planeando de ir a la luna, pishin fue i derroko las tabelas ke estavan diziendo “colored”.
Una de las otras mujeres pretas avryo proseso para pueder estudiar en una eskola para blankos i reusho a azerse injeniera, la primera i pudo ser el asistente de la persona (judyo siguro) ke estava konstruyendo el astronave (uzay gemisi).
La tresera mujer fue la primera mujer (i preta!) ke pudo dirijir el departamento de IBM de NASA kon su ekipo de mujeres pretas en el empesijo i kuando se adjuntaron mujeres blankas tambien, kon un grupo grande de matematisyanas.
Si no vitesh este filmo vo lo rekomendo. Esto sigura ke vos va plazer muncho. A vezes ver un filmo ermozo mos traye konsiensia de la istoria i de lo ke se paso i apersivirmos ke lo ke para mozotros es muy normal oy en dia no era del todo normal en tiempos antiguos.
Saludozos ke estesh.
