Antes de pasar al sujeto (malorozamente kaji syempre el mizmo) de mi artikolo, kero felisitar kalorozamente mi kerida amiga Karen Şarhon ke fue eskojida komo una de “las syete mujeres las mas valorozas de Istanbul” grasyas a su grande aktividad afin de azer arrebivir muestro dialekto ansestral el kual fue por un largo tyempo arrebashado a la sigida de un vano prejuisyo de desdenyo ke se puede atribuir a las olas de esnobizmo ke avian soplado poko antes la segunda gerra mundyal en syertos grupos de muestra komunidad.
Tambyen dezeo personalmente afirmar el grande merito ke revyene a muestro infatigavle Silvyo Ovadya por su enorme partisipasyon a este mizmo esforso de no deshar muestro ‘pasado komunitaryo’ undirse en el olvido i la indiferensya. La verdadera sivilizasyon no es “un todo monolitiko echo de un solo pedaso” ma un adjuntamyento de esforsos diferentes echos en el mizmo objetivo.
Esto dicho i konfirmado kon grande gratitud, pasaremos al sujeto de todo lo ke aktualmente oskurese la atmosfera del mundo… De muevo el mizmo radikalizmo egzajerado en munchos payizes evropeos, de muevo un nasyonalizmo absoluto ke impide de ver mas leshos ke si mizmo i su solo interes.
Komo ya lo savemos todos i lo ke la Prensa Internasyonal no manka de repetar de una manera kaji obsesiva, desde la venida de Donald Trump al poder, los djudyos liberales del Este komo del Oeste de la Amerika del Norte son muy inkyetos a la sigida de las varyas ’amenazas de bombardamyento’ embiadas klandestinamente a varyos sentros relijyozos i sosyales djudyos.
Kaji en kada lugar del mundo (salvo byen entendido en Israel) olas de odyo paresen aktualmente dirijidas kontra muestros korelijyonaryos, semeteryos son de muevo sakeados, tombas destruidas i ansi profanadas salvajemente, lo ke mos aze pensar ke no es solo el selo ma partikolarmente la rankor ke domina en estos aktos de destruksyon, tal un menester psishiko de kerer tomar vengansa.
Tomar vengansa de kualo? Ke maldad les izyeron muestros aktuales korelijyonaryos o muestros padres, salvo de kedar atados a los preseptos relijyozos komo tambyen etikos de muestra Fey?
Ninguno save realmente ken son los verdaderos responsavles de esta situasyon i otomatikamente los sospechos se tornan en direksyon de la mueva administrasyon amerikana en la kuala dominan myembros ekstremistos del partido ultra nasyonalisto.
Una investigasyon echa, si no me yerro en el anyo 2014, a este sujeto mos ambeza ke “el antisemitizmo mesklado al anti-Israelizmo” esta en perpetual progresyon. El tablo trasado a este sujeto es muy alarmante. En efekto en el anyo 2015, la “Anti Diffamation League” deklaro de su parte ke muy nombrozos insidentes anti-djudaikos se avian produzido en varyas demokrasias liberales tal la Suesia, la Beljika, la Fransya i munchos otros payizes evropeos, ande los djudyos biven aktualmente si no en el espanto ma seguramente en un djenero de inkyetud. Eyos son munchas vezes konfrontados a ‘sloganos de odyo i amenazas de muerte’ de parte de sitizanos otoktones komo tambyen de ajenos venidos de lugares mas o menos leshanos.
No mos olvidaremos los orrivles aktos asasinos empapados de anti-djudaizmo perpetrados por ijos de imigrados de las vyejas koloniyas del Norte de la Afrika o del Oriente Medyo i esto en el payis ke fue la patria de Montaigne komo tambyen de Viktor Hugo.
Todos fuimos testigos (si no vizualmente ma moralmente) del orrivle asalto kriminal kontra la eskola primarya djudia “Otsar Ha Torah” en Toulouse ande muryeron ninyos por la mas parte Israelyanos i tambyen, mas tadre, del golpe asasino kontra el chiko market ‘glad Kasher’ de Vincennes en Paris, ansi ke de una grande sala rekreativa ande abitualmente se enkontravan nombrozos de muestros jovenes.
Ken ke seamos, de kuala relijyon i de kual partido politiko ke agamos parte, no mos es permetido de kedar indiferentes delantre la progresyon alarmante del perikolo ande se topan no solo muestros ermanos ma tambyen kualkyer otra kriansa de Dyo.
Vengo de meldar varyos artikolos a este sujeto sinyados por Michael Laitman grande profesor de Filozofia, Ontolojia i Kabala; artikolos de los kualos dezeo darvos una chika idea segun lo ke pude entender.
El mos dize kaji tekstualmente “La inkapachidad de los djudyos a dominar sus nombrozas diferensyas de opinyon mostra asta ke grado mos aleshimos de muestra Verdadera Erensya (ebraika).
Aktualmente los djudyos son perikolozamente fraksyonados. Los djudyos liberales i los konservadores devinyeron tanto diferentes los unos de los otros ke ‘kada parte’ va mizmo asta pensar ke ‘la otra’ se komporta kontraryamente a las valores las mas importantes del Djudaizmo.
En uno de los nombrozos artikolos del mizmo filozofo, el mos dize ke “el kulto del Ego” se desvelopo a un tal grado ke el provoko un djenero de Narsizizmo, el kual es muy danjerozo i difisil a venser.
En efekto, en esta atmosfera de amenazas ande el djudaizmo parese de mas a mas undirse, lo ke es lo mas preokupante es el espanto de una divizyon entre sus myembros.
La mas grande valor de muestra Fey es la Unyon entre sus varyos myembros, aun las diferensyas de opinyon komo de aspirasyon ke se puede topar entre eyos.
“Ama tu proksimo komo ti mizmo” mos ordona la Torah.
