Keridos Korelijionarios.
Este anyo tanbien selebramos el “Pesah” ke es la fiesta de libertad i ke nos apregona la primavera, djuntos nuestra famiya i nuestros serkanos en plena prosperidad i alegriya todo en agradesyendo a El Altisimo Dyo ke nos eskapo del esklavaje de Ayifto.
Tanbien nos aderesamos verso El komo kada anyo i lo remersiamos en dizyendo:
“Baruh Sheeheyanu Vekiyemanu Veigianu Lazeman Aze”
Todo en konformandomos kon kudio a las reglas espesialas por estos ocho diyas.
Tanbien tenemos ke valorizar una otra vez el evenemento de “Pesah” siendo ke es el sentro de la nasyonalidad djudia i en mezmo tiempo la baza fundamentala ke forma la identidad djudia.
En nuestra Santa Tora ke nos alkanso asta oy sin ninguna modifikasion i ke guadrara su valor asta la eternidad sigun nuestra kreensa el Santo i Bendicho El se denomina komo:
“Anohi Ad. Asher Otseti Ethem Meerets Mitsrayim”
“Yo So el Dyo ke Vos Kiti de Tierra de Ayifto.”
Pienso ke tenemos de arivar a la realidad eskondida detras de estos biervos mezmo en las kondisiones aktualas.
Una de las bazas prensipalas de “Pesah” es:
“Meavdut Leherut Umishibud Ligeula”
“Del Esklavadje a la Libertad i del Kativeryo a la Salvasion”
Ke estos biervos no se enterpretan solo en senso fiziko, ke sino se deven de entender komo una modifikasion i reformasion en senso moral.
Pienso ke los biervos “libertad” i “salvasion” de una parte nos da a entender la salvasyon del individuo djudyo de sus kadenas pensativas i de otra parte nos ensenya de meternos en la pena de salvarnos del abizmo de todo modo de vanedad, neglijensia i materializmo.
Pienso tanbien ke el modo el mas apropriado i siguro es el dependerse kon su propia veluntad a la disiplina djudia i afirmar sus preseptos i de transmeter nuestra kultura dizde kuarenta siglos a las nuevas jenerasiones.
Mirando de este punto de vista el:
“Veigadta Levinha/ I Kontaras a tu ijo”
ke resitamos en la “Agada” i el testamento de Moshe Rabenu eskrita an la santa Tora:
“Veshinantam Levaneha Vedibarta Bam”
“I Ensenya a tus ijos Avlando de Esto”
kontienen un paralelizmo de alta konsiderasion.
Siendo yeno de estos pensamientos i sintimientos, vos bendigo a todos vozotros kon todas las bendisiones de la Santa Tora i vos auguro un buen “Pesah” kon todos vuestros keridos i serkanos dentro union, salud, pas i prosperidad.
Hag Pesah Sameah
Moadim Lesimha
Rav İsak HALEVA
