Si… Es ke en el futuro los djudyos puedran totalmente perdonar i olvidarsen la ignominia de los ke (sin razon ni kualkyer verdadero motivo) eksterminaron 6 milyones de sus ermanos?
Por las oras el antisemitizmo parese pujar kada dia mas i el ultra nasyonal-sosyalizmo enfloreserse poko a poko en la Evropa komo tambyen en los Estados Unidos.
Alhad pasado, el 23 del mez de April fue el dia komemorativo de la Shoah en su inegualavle desgrasya en Almanya i otros payizes evropeos a tendensya jermanika, los kualos (paradoksalmente) paresian portanto aver ayegado a un muy alto nivel de progreso syentifiko komo tambyen literaryo i filozofiko; progresos ke dyeron a muestra epoka munchos de los mas grandes savyos, filozofos, eskritores, ansi ke artistos, pintores, muzisyenes i kapos de orchestra.
Mas alto es el nivel kultural de un payis, mas graves son entonses las kulpas ke sus sitizanos perpetran.
Komo munchos de los lektores de este artikolo ya lo saven por seguro, en el pasado, un djornalisto tuvo la idea de demandar al filozofo djudyo Vladimir Jankelevich si un dia el puedra perdonar.
El grande intelektual respondyo simplemente: “Mis ijos? Puedeser… Ma yo personalmente? No kreo…en todo kavzo nunka a Martin Heideger”.
En la epoka de sus estudyos universitaryos, Martin Heideger avia sido uno de los profesores ke Vladimir Jankelevich admirava lo mas i del kual el se avia muncho ambezado.
El lo konsiderava komo uno de los mas grandes pensadores de la primera mitad del venten siglo, ma desfortunadamente en 1933, el grande pensador alman devino un fervyente myembro del partido nazi i mizmo durante los anyos sanglantes de la segunda gerra mundyal (sin nunka aver personalmente partisipado al orrivle karnaje) guadro las mizmas relasyones empapadas de amistad kon los ke perpetraron los aktos los mas kriminales de todas las epokas.
A notar ke a la fin de la segunda gerra mundyal las ‘Altas Institusyones Juridikas Internasyonales’ persigyeron por seguro (asta el mez de mayo 1965) los responsavles de este orrivle krimen, uniko en su krueldad i su inumanizmo.
I oy, mas de setenta i sinko (75) anyos dospues del empesijo de lo ke yamamos kon razon “la Shoah” una mizma kestyon mos obseda syempre no solo en muestro esprito ma sovre todo en muestra konsyensya: ‘Es ke mozotros djudyos aktuales puedemos realmente perdonar a la memorya de los ke (sin remorso) dyeron la muerte a nombrozos de muestros ermanos i ermanas ke eran ombres i mujeres inosentes ansi ke a ninyos envezes rezin nasidos ke fueron salvajamente matados sin ke konoskan kualo es la vida?... Es ke tenemos el derecho de olvidarlos?’
‘Olvidar’ es por seguro, una probabilidad absolutamente imposivle, mizmo en el kavzo ande syertos de muestros ermanos renunsyaran a azer kualkyer esforso de reminisensya kuando se trata del silensyo del Puevlo Alman.
I ansi, una otra pregunta parsyalmente similarya aun esensyalmente diferente, mos persige: “Es ke se puede perdonar a los ke (mizmo sin mancharsen las manos de sangre) desharon azer murir inosentes sin revoltarsen kontra el kruel karnaje?” La kestyon keda kaji syempre sin repuesta.
Kon el tyempo ke pasa i ke envezes troka la facha de los faktos i de las kozas, la Memorya Djudia sera probablemente de dia en dia manko severa kon eyos.
Munchos faktores pudyeron intervinir en el silensyo del puevlo alman delantre la salvajeria de akeyos tyempos ande para kualkyer individuo la amenasa de un kastigo sin piadad era syempre omniprezente.
La epoka ande el jenosidyo del puevlo djudyo se produzyo no fue nunka muy klara, ni a ningun momento fasil a bivir para ken ke fuera, mizmo para los sivdadinos otoktones ke tenian sangre jermanika en sus venas.
Es posivle ke kada uno de entre eyos pudo sentir un terrivle terror personal mesklado a syertos prejuisyos eredados de los tyempos kaji ansestrales ke syempre son prontos a krear un ambiente de insertidumbre i de dubyo.
Si komo dicho mas arriva, el antisemitizmo no dezaparesyo totalmente en Almanya ni en ningun otro payis de la Evropa aktual…en el korason de algunos de sus sivdadinos persiste syempre la iluzyon de ser superyor a los otros.
