“YOM ASHOA” es el diya de komemorasyon de la mas grande trajediya umana del siglo 20. De todas las partes del mundo, grupos partisipan a la “Marcha”. Estas personas, no satisfechos de sintir o meldar sovre este akto inumano, keren ser un ponte entre el pasado i el avenir... Keren sentirlo en sus almas para pueder transmeter a sus ijos i inyetos... Para amostrar al mundo ke malgrado todo, estamos egzistyendo. Los kampos de la muerte i entre otros Auschwitz, el simbolo funesto de la mas grande trajediya de la Istoria de los Djudios... No devemos nunka olvidarlo. Se eskrivera, se mensyonera i se repetara asta la fin de los tyempos. El Olokosto no es un evenimyento ke deve kedar solamente entre las ojas de la Istoria. Es una realidad, es ser konsyentes ke semejantes kavzos syempre pueden akonteser en las kuatro partes del Universo.
24 Avril es el Diya de Komemorasyon del Getto Varshova. Serkamente ya eskrivi sovre este sujeto. Oy, aprovechandome de syertos tekstos ke estuve meldando, kero azer un chiko analiz del Olokosto i kuala es la razon de la defensa de enyegarlo? Afirmar ke el Olokosto es una mentira i ke no uvo un kavzo semejante, no ay dubyo ke en el fondo tiene komo baza el Antisemitizmo. El buto de esta negasyon es enflamar la enemistad kontra los djudios i arrebivir en la Evropa la ideolojiya Sosyalista de Adolf Hitler”.
Finalmente, kero relatar syertos pasajes tomados del livro “UNE VIE” (Una Vida) de la Sra. Simone Veil.* Eya es una sovrebivyente de la “Shoa”. Nasyo en el 1927 komo la kuatrena ija del kupl Yvonne-André Jacob, i tuvo una chikes oroza. La identidad judia era una konsiderasyon sin importansa para su padre. Antes de todo, ser Fransez era “primordial” para el Sr. Jacob. Sintiremos la Sra Veil: “Komo todas las famiyas djudias asimiladas, mi famiya paternal era patriota i laika. Se glorifikava kon su Patria, la Fransiya, ke aviya dado desde 1791, el derecho kompleto de “Nasyonalidad” a los djudios... Afilu el koryente de “Antisemitismo” solevantado myentres el “Kavzo Dreyfus”, no troko los sentimyentos de mi padre... No konosi dinguna nosyon de Judaismo en mi chikes porke mi papa era djudio, no por egzijensyas relijyozas, ma, por razones kulturalas. Asigun el, solamente los djudios i los aristokratos, durante siglos, fueron eruditos i meldaron...” Ma, el “patriotismo” del Sr. Jacob, malorozamente no fue un impedimyento a la deportasyon de la famiya entera al kampo Auschwitz-Birkenau...
Shoa, el “Génocide” sinyifika la totalidad de las kulpas kometidas sovre un grupo etniko-relijyozo. Kero terminar kon las frazas del ilustro eskrivano, Elie Wiesel, el tambyen un reskapado de la Shoa, un sovrebivyente... “Oy en diya vamos demandando: kualo es Auschwitz?... Un final o un empesijo? O, un aborresimyento alimentado kon senaryos de komploto, kon kampanyas kontinualas manchando, kalomniando un puevlo?... O, puede ser, una vizyon de la vanda diabolika del karakter umano?...”
(*) Simone Jacob Veil nasyo en 1927 en Nice. En Marso 1944 fue deportada kon toda su famiya a Aushcwitz-Birkenau. El 29 Enero 1945 fue reskapada. Estudyo en la Universidad de Paris, entro en la Politika. En 1975, fue “Ministro de Sanedad”. Entre los anyos 1975-1982 fue prezidente del Parlamento Evropeo i mas despues, prezidente “Onorarya” de la “Fondasyon por la Memoria de la Shoa”, ke apoyo aktivamente la Fondasyon J.E.A.A (Judeo-Espanyol a Auschwitz).
Asta Marso 2003, en el “Memorial Auschwitz-Birkenau, entre las 20 lajas en diferentes linguas, no aviya una en Judeo-Espanyol.. Lingua ke fue la de 160.000 Sefaradis deportados del Balkan i otros paises. Grasyas a las tentativas de J.E.A.A enkavesado por Prof. Haim-Vidal Sephiha, el 23 Marso 2003 se estreno la laja en J-Espanyol. Tuve la okazyon de azer tekstos konsernando la Sovredicha Laja.
