La felisidad es el buto de muestra vida. Todos los esforsos ke azemos es para apanyar la felisidad. Komer, kaminar, ganar paras, pasar el tyempo kon los amigos, orasyonar, desveloparse de si para si para pueder avansar i trokar el punto de vista, los komportos pozitivos i negativos en mizmo tyempo syerven (hizmet etmek) al buto de una vida kon felisidad. Por egzempyo, asistir a un funeray, vijitar un hazino, okuparse de un vyejo…
Puedemos ver ke unos komportos mos azen orozos direktamente komo por egzempyo komer una komida savroza i unos komportos (davranış) mos azen orozos endirektamente (dolaylı olarak) komo ayudar a una persona o envitar a una persona ke no tyene dingunos una noche de fyesta. Estos aktos son emportantes i mostran el sentimyento de responsabilidad ke tenemos.
En muestra epoka la felisidad esta solamente en raporto kon la moneda. Siguramente ke tenemos menester de moneda para pueder bivir, ma solo la moneda no abasta a azer la persona o la vida oroza kon todos los puntos de vista (her açıdan).
Komo disho Descartes, “La persona tyene menester de tres kozas para ser orozo. “La Amistad (Dostluk), La Independensya (Özgürlük) i El Pensar (Düşünmek)”.
* La felisidad es la apartenensya (aidiyet).
* La felisidad es ser si mizmo (kendin olabilmek) sin maska i sin rolo (maskesiz ve rolsüz).
* La felisidad es kerer byen al den frente i ser amado (sevilmek).
* La felisidad es la konfiensa (güven).
Kuando las personas empesan a envyejesersen a poko a poko, no ay de espantar si la kavesa esta en si.
Porke los mansevos i mizmo los ijos no estan puedyendo suportar los vyejos en esta epoka ke estamos bivyendo?
Me akodri de mi gramama (z”l) ke era una persona muy entelijente ke diziya kuando teniya 90 anyos:
“Peza el oro, peza el plomo, peza el benadam mas ke todo”.
Ya es verdad. Kero darvos unos kuantos egzempyos por mostrar ke kuando pasan los anyos no es la fin de la vida.
Si la persona kere lavorar, kere eksperimantarse (geliştirmek) en kualker koza, no es tadre para azerlo.
• “Mimar Sinan” el arkitekto famozo termino la meshkita Suleymaniye kuando teniya 70 anyos. Konstruizo la meskita Selimiye kuando teniya 86 anyos.
• “Goethe” termino su ovra famoza “Faust” en lo ke teniya 83 anyos.
• “Charlie Chaplin” era el direktor (yönetmen) de filmos i lavorava a los 78 anyos.
• El doktor aleman ke gano el premyo de Nobel, “Albert Schweitzer” mizmo ke teniya 88 anyos estava lavorando en los ospitales de la Afrika i estava azyendo operasyones.
La manseves no tyene raporto kon una syerta epoka. Si la persona tyene konfiensa en si se konta mansevo, si tyene dubyo (şüphe) se konta vyejo.
• En la proporsyon de su koraje se konta mansevo, en proporsyon de sus espantos es aedado.
• En la proporsyon de sus esperansas es mansevo, i al kontraryo en proporsyon de sus dezesperos es aedado.
Dingunos no se envyejesen de bivir anyos largos. Kuando los ideales se enterran (gömülmek) la persona se syente aedado. Kuando la persona desida de ser aedado, es aedado. La persona ke no perye la kapachidad de ver la ermozura de la vida, nunka se envyejese.
Envyejeserse parese a suvir a una montanya. Suvyendo puja la kanserya. La respirasyon se estrechea (nefes daralır), ma el punto de vista (görüş alanı) se anchea (genişler).
En proporsyon ke muestro meoyo deskuvre (keşfetmek) muevas eksperyensas, no ay safek de ser aedado, la persona se konta manseva.
Kale azer todo el posivle para kedar mansevos Keridos Lektores, i de Kavesa, i de Salud i de Puerpo.
Kedavos en la buena ora!
