Kurioza koza estas postas! Kada dia mos traye todo reklamas. No ay mas ken mos eskriva una letrika, komo antes. Estamos todo kon “emails”, o Facebook, o no se kualo mas en la komputadora o en telefones selular.
Ma orozamente tenemos El Amaneser, djuntos kon el Şalom, ke mos viene por posta una vez al mez, en akeya envelop de plastik blu, bien konosida.
Una ves al mez? No siempre. Al pareser es ke el postadji mo las traye kuando le da la gana, i no siempre “a la sira” (en propio orden)! A vezes vienen “al reves de los buenos dias.” El de Avril me yego antes dos semanas i OY, el 2 de Mayo, me yego el de Marso!
I kuando veygo akeya envelop blu de plastik, desho todo lo ke esto aziendo, i empeso a meldar su kontenido. Me agrada meldar todas las dos publikasiones, El Amaneser i el Şalom tambien. Ya miro kada semana al sitio del Şalom en Internet, ma no puedo meldar todo, porke no me agrada estar asentada delantre dela komputadora, meldando del ekran muncho tiempo. Es otro plazer asentar en el fotolyo i meldar kon repozo lo del papel.
Esto eskriviendo agora es en repuesta a lo ke meldi en la kolona “Son Çağrı” de Tilda Levi, la editora del jurnal, en el Şalom del 1 Mart 2017. Eya eskrive en turko, ma aki estava tratando en primero del deskansado Elie Perahya, z”l, ke era su mentor, i ke eskrivia en djudeo-espanyol en Şalom.
Tilda se esta akodrando, entre otros, ke Elie por largo tiempo eskrivio en el Şalom la seria titulada “La Huente”, de traduksiones de pensamientos de sensya i saviduria para la vida, ke i a mi tambien me plazian muncho.
Despues, Tilda aze una yamada a sus lektores de partisipar a la konservasion del djudeo-espanyol, i alava a todos los ke partisiparon a la prezentasion umoristika en esta lingua en el Limud de oganyo. Tilda no solo esta yamando, esta rogando, ke los lektores agan un esforso para eskrivir unas kozikas kurtas para la pajina en djudeo-espanyol del Şalom a lo menos una vez al mez, aunke el Şalom tiene ke inchir la pajina en djudeo-espanyol kada semana. La reponsable de esta oja espesial es muestra kerida Klara Perahya, ke mos biva munchos anyos mas.
Por esto es ke eskrivi yo estas linyas.
I yo me adjunto a Tilda en su yamada: eskrivir en muestro Espanyol, ayudar a mantener la lengua ke avlaron muestros antepasados i la mantuvieron biva por mas de 500 anyos. Si lo azesh una vez solo, vash a ver ke vash a tomar plazer, i vash a kerer repetar este esforso. I tambien, no vos olvidesh ke esta lingua vos ayuda a darvos a entender kon tantos milyones de espanyol-avlantes en el mundo!
Kon munchos saludos a todos los ke meldaron mis biervos, i ainda mas kon apresiasion a todos los ke toman i tomaran parte a mantener muestra lingua ansestral.
Rachel Amado Bortnick
Dallas, Texas, U.S.A.
