Es una fatalidad ineluktavle: ‘Ningun momento de armonia perfekta puede turar muncho tyempo’… Parese aver en el destino de la kriansa umana komo una fuersa negativa ke la ovliga syempre a despertarse de kualkyer suenyo idiliko.
La euforia de los tres o kuatro primeros dias ke sigyeron la viktorya de Emmanuel Macron fue para una grande parte del puevlo no solo del payis de Descartes, ma tambyen de la Evropa kaji entera, komo un profundo reflo de ayre puro.
‘La amenaza de un governo ultra nasyonalisto evropeo empapado de ideas integristas i fanatikas’ paresia aver pedrido su virulensya, komo si en supito una fuersa milagroza avia instalado la Umanidad en una atmosfera de amistad i de akseptasyon mutual.
Ma, komo mozotros umanos lo savemos muy byen: “Ninguna viktorya es desiziva i la lucha deve syempre persistir”.
En efekto, antes unos kuantos dias, la prensa eskrita mos ambezo ke el partido ‘En Marche’ de Emmanuel Macron fue ovligado por razones etikas de suspender la investitura akordada al produktor de televizyon Christian Gerin, despues de aver deskuvyerto ke ‘el’ era el autor de ‘tweetes antisionistos i anti- Israelyanos’.
Aedado de 62 anyos, Christian Gerin figurava en la lista de los 428 kandidatos investidos debasho las kolores del resyente partido yamado la “Republique en Marche”.
De sus parte, esmovidos de los mensajes tweetados entre los kualos munchos eran muy kontraryos al Estado Ebreo i igualmente al Djudaizmo, el Crif i la Licra se sintyeron ovligados de prevenir Emmanuel Macron del fakto en kestyon, en el objetivo de meter fin a este odyo sin razon ke data de los leshanos ansestros kristyanos, lo ke en efekto fue immedyatamente echo.
Tal ke fue dicho mas arriva “Ninguna viktorya es desiziva i la lucha deve syempre persistir”.
