El 6 del mez de SIVAN, vamos a selebrar la Fyesta de SHAVUOT. Antes unos kuantos anyos, en un artikolo ke estava preparando para esta fyesta muestra, me aviya permetido de transferar un teksto de muestro kolaborador i amigo, el Sr. Yehuda Hatsvi. I oy, de mezmo kero dar otruna vez estas linyas ke mos azen konoser una facha (a mi opinion) diferente del mez de Sivan.
El sovredicho teksto fue publikado en uno de los primeros numeros de El Amaneser. Kon estas linyas esto mandando tambien muestros sinseros suetos a todos los lektores.
“El mez de Sivan se nombra por la primera vez en Megilat Ester (8-9). Este mez fue empesijo de bien. En el 23 del mez de Sivan, el Rey Ahashverosh dyo el firman (ferman) dizyendo ke los djudios en todos los paizes de su reynado, tienen el derecho de defendersen kontra sus enemigos. Ma, el diya mas Santo i temerozo en este mez, es la fyesta de Shavuot, en la kuala, komo dize el piyut eskrito por Rabi Yehuda Kalayi: En este diya abasho el Dio en Sinai a dar La LEY a su puevlo Yisrael. Asigun la leyenda, David Ameleh muryo en el diya de Shavuot. Una de las razones del uzo de meldar la Megila de Ruth en diyas de Shavuot, es porke David fue el desendiente de Ruth la Moavita…” (fin de sitasyon).
Oganyo, el 31 del mez de Mayo vamos a selebrar la fyesta de Shavuot ke se yama tambien Hag Habikurim. A la okazyon de este diya, kero prezentar estos versos miyos eskritos antes unos kuantos anyos. Hag Shavuot Sameah.
Fyesta de Leche i Miel
En medyo de los dezyertos,
En el Monte de Sinay,
Los Dyes Komandamientos,
Mo los arregalo Adonay…
Oy en diya el mundo sivilizado
Se va demandando komo?
Muestro Profeta, Moshe Rabeno,
En medio d’un Mundo primitivo,
Pudo ofreser a el Judaismo
Estos preseptos maraviyozos.
Un imno a la gloria de Dyo,
Ke muestro Padre arresivyo.
Hag de leche i miel: Shavuot,
Grande komo Pesah i Sukkot...
