Fue grande i muy profunda la tristesa ke munchos de entre mozotros sentimos a la sigida de los dos kavzos inumanos en los kualos las prinsipales viktimas fueron jovenes, adolesentes i ninyos arrankados indjustamente a la vida.
El primer: noche de Lunes de la semana pasada en Manchester, a la salida de un konserto partikolarmente apresyado por los jovenes de la sivdad, verdadera trajedia en la kuala 22 de entre eyos pyedreron la vida.
El segundo kuatro dias mas tadre en Ayifto, durante el asalto kriminal dirijido kontra un otobus yeno de sitizanos koptes (kristyanos) entre los kualos 28 de entre eyos por la mas parte de chika edad serraron por syempre sus ojos.
Aktos de salvajeria inumana, portanto el primer komo tambyen el segundo krimen fueron kaji immedyatamente asumidos i mizmo se puede dizir revendikados kon glorya de parte de “Daesh”, grupo terroristo oto-nominado ‘Kalifato’, el kual kaji syempre anunsya ser el autor de semejantes aktos asasinos i esto mizmo si los verdaderos responsavles tyenen una nasyonalidad diferente.
‘Esta presipitasyon a asumir la responsabilidad de faktos inyovles’ puede pareser sin ninguna sinyifikasyon a personas reelmente lojikas. Ke motivo de glorya puede topar el pretendido Kalifato DAESH en la muerte de inosentes?
A notar ke partikularmente en Evropa, munchos de estos asaltos terroristos son perpetrados por ijos o inyetos de los primeros migrantes asiatikos o afrikanos entre los kualos syertos de entre eyos bivyeron i biven ainda oy en el sistema komunitaryo de sus avuelos, kaji todos rekojidos en los mizmos baryos, kon los mizmos uzos i las mizmas kostumbres.
No leshos de sus moradas, se topan chikas i grandes eskolas ande son unikamente ensenyadas: la Istorya komo tambyen la Relijyon Islamika kon todos sus preseptos por la mas parte de grande valor ma ke (por mankura de tyempo) empiden envezes el estudyo syentifiko i filozofiko del payis ande se topan los estudyantes, lo ke provoka difikultades de reel adaptasyon a syertos de entre eyos.
Esto dicho, no se puede nyegar ke (kualas seyan las razones ke lo provokaron) ningun faktor puede djustifikar el akto de dar la muerte a kualkyer persona ken ke eya sea. Un krimen es syempre un krimen i ainda mas kuando se trata de viktimas de las kualas el solo pekado es de amar la muzika i partikularmente la Vida.
“Kavzar la muerte de un ninyo kon su potensyal intelektual i psishiko” es mizmo un krimen kontra la umanidad i ningun pasaje o paragrafo de kualkyer Livro Santo, kual ke sea: la Biblia, el Evanjelyo o el Koran, puede djustifikar este akto.
Un djesto asasino es tambyen un krimen kontra la relijyon a la kuala el responsavle apartyene, mizmo kuando el da komo razon un pasaje obskuro byen o mal interpretado del Livro Santo al kual el se refera.
Komo fue dicho i repetado munchas vezes de parte de grandes pensadores Muzulmanos, Kristianos i Djudyos, kuando se trata de Livros antiguos, no kale nunka interpretar kualkyer pasaje sin tomar en konsiderasyon el siglo ande el fue eskrito.
A notar tambyen ke kuala ke eya sea, “ninguna verdadera relijyon monoteista puede ser manka de una rezya baza de moralidad”. El Dekalogo en su valor inkonmensuravle mos ordona de no matar i de syenpre respektar ‘el Otro ke si mizmo’.
