Si, de muevo lagrimas, dolor i anksyedad en Evropa, partikolarmente en la Grande Bretanya ande se produzyeron diferentes kavzos los unos kriminales, los otros konsekuensa de graves neglijensyas.
La situasyon en este momento no esta muy klara; la Polisia ingleza eya mizma se topa en un estado de perpleksidad konsernando munchos kavzos.
De una parte, en el espasyo de dos o tres semanas, se produzyeron dos grandes atakes kriminales, el uno en Manchester a la salida de una sala de konserto, el otro sovre el ‘London Bridge’ en la kapitala mizma del payis, golpes asasinos ke okazyonaron la muerte de nombrozos adolesentes i jovenes.
De otra vanda “el insendyo de myerkoles pasado de la Torre Greenfel en Londra mizmo” fue un golpe psishiko muy difisil a soportar.
Konsekuensa de multiples neglijensyas de parte de los responsavles del distrikto munisipal ande akontesyo la desgrasya, komo tambyen de la administrasyon del inmenso edifisyo, este terrivle evento desperto en los korasones de munchos sitizanos del payis, fuertes sentimyentos de ira i ravya.
I komo si esto no bastava, en otro lugar de Londra, serka de la Meshkita de Finsburg, ‘el konduktor de una kamyoneta’ echo voluntaryamente su vehikulo sovre un grupo de personas, firyendo ansi 10 de entre eyas. La Polisia pensa kon grande konviksyon ke se trata de un akto terroristo.
Mas leshos, se topo tambyen un ombre muerto, ma por el momento no se puede afirmar si este krimen es o no es la ovra del mizmo matador.
A notar ke syempre en el mizmo estilo, muevos atakes al pareser syempre djihadistos fueron perpetrados kontra sitizanos inglezes de konfesyon muzulmana salyendo de la meshkita ande uzualmente eyos van para orasyonar en estos dias sakros de Ramazan.
En Paris de mezmo al empesijo de la semana aktual, se produzyo un kavzo kaji semejante en su proyekto de egzekusyon, por el kual no ay ainda ninguna informasyon sigura de parte de la polisia.
Las desgrasyas de la Evropa no se limitan a estos tristes kavzos de djihadizmo; en efekto de otra parte, en una shara del Portugal uvo un enorme insendyo ainda no totalmente vensido ke se espandyo asta munchos baryos vezinos, azyendo ansi 62 muertes.
Se pensa sin ainda pueder reelmente afirmar ke la kavza prinsipal es el ekseso de kalor … o puede ser un akto de neglijensya de parte de ekskursyonistos …
Si… komo personalmente lo repeto de una manera kaji obsesiva, mos topamos en un mundo ke, para munchas personas, parese devenir de mas a mas kaotiko.
En vezes me demando si esta kontinual repetisyon de mizmos temas no se izo en mi un djenero de idea fiksa. Ma, es ke la persona puede kedar kayada kuando dia despues de dia varyos diaryos o semanaryos mos komunikan aktos terroristos perpetrados kon armas muy sofistikadas, malorozamente en grande kuantidad de orijen evropea o amerikana, puede ser re-vendidas a puevlos enemigos de parte de los reeles merkadores, fakto ke no se puede ni afirmar ni nyegar i ke a el solo konstitue un paradokso muy difisil a eksplikar.
Otro egzempyo, la Prensa mos ambezo tambyen ke dia de Vyernes pasado el 16 del mez koryente, una polisyera Israelyana en funksyon muryo (ke su alma repoze en Ganeden) a la sigida de un atake enemigo serka de la “Puerta de Damas” a proksimidad de la vyeja sivdad de Yerushalayim.
Son desgrasyadamente, faktos koryentes ke akontesen kon grande frekuensa en este djenero de espasyos estratejikos entre los dos puevlos vezinos ke ainda no pudyeron azer el paso nesesaryo para ayegar si no a una situasyon de grande amistad, ma a lo menos a un estado de ‘No belijeransya’ grasyas a un esforso de toleransya mutual.
Kaji immedyatamente despues el anunsyo del akto terroristo en kestyon, el “Estado Islamiko EI” revendiko otomatikamente i kaji kon glorya la responsabilidad de la muerte de la dicha polisyera israelyana, afirmando ke “Los liones del Kalifato atakaron una konsentrasyon de djudyos”, revendikasyon ke unas kuantas oras mas tadre fue desmentida de parte del Hamas, el kual afirmo ke la revendikasyon del krimen de parte del Kalifato Islamiko (DAESH) es una simple tentativa de ‘mesklar las kozas.
A los lektores de pensar i djuzgar.
