Si… Simone Veil serro por syempre sus ojos, ma nunka eya dezaparesera enteramente de la memorya de munchos de entre mozotros malgrado ke no tuvimos todos el privilejyo de konoserla de serka...
Eya, por ansi dizir, inkarnava la enerjia de un esprito byen pensante ke savia ver mas leshos ke ‘lo ke es vizivle’.
Vyernes la tadre kuando avri mi ordinador para konoser los ultimos faktos jeneralmente negativos ke se pasaron en un mundo riko en eventos trajikos, la primera koza ke travo mi atensyon fue la fotografia de una mujer muy luzya aun su edad avansada, kara resplandesyente ande se reflektavan simultaneamente una dulsor natural i tambyen un djenero de enerjia muy fuerte ke afirmava su intisyon de nunka abokar kavesa ni renunsyar a kualkyer lucha en favor de sujetos ke eran primordyales para eya.
No se por ke razon, la triste novedad me sorprendyo muncho, no me imajinava nunka ke un dia eya iva abandonar sus esforsos para alkansar a un mundo puede ser mas djusto i sovre todo mas umano.
No la konosi personalmente ma grasyas a mis lekturas de varyos diaryos o revistas mensuales de un nivel intelektual bastante alto ke mos avlavan munchas vezes de su grande aktividad intelektual komo tambyen politika, la imajinava syempre aktiva i enerjika. Ma la realidad fue manko dulse.
Eya era la ija de un padre de orijen djudia ma asimilado a la sivilizasyon aktual, un ombre ke avia guadrado del djudaizmo ‘solamente su Etika i su profundo Umanizmo’.
Durante la segunda gerra mundyal, Simone Veil (nasida Simone Jacob) fue mandada a la edad de 16 anyos kon su madre i una de sus dos ermanas en un orrivle kampo de konsentrasyon ande el syelo era kaji syempre oskuresido por el umo ke salia de la chimenea del krematoryo; su segunda ermana avia, eya, echo parte de un grupo klandestino de protestasyon.
Su adolesensya fue ansi empapada de la orror ke se pasava en los ‘kampos de la muerte nazis’ i a la fin de la gerra fueron oras terrivles de anksyedad ansi ke de revolta para las dos mansevikas, kuando despues la muerte mas o menos natural de sus madre, eyas entendyeron ke sus padre i ermano ke se topavan en otro sentro de eksterminasyon no responderan nunka a sus inutil bushkida.
No se si en su ninyes, Simone Jacob (Veil) paresia ser destinada a tener la vida ke realmente fue la suya, una vida al empesijo muy amarga i poko despues una lucha perpetual de revendikasyon de djustisya sosyal.
Despues la trajika amargura de la Shoah, Simone Jacob (Veil) retorno a la vida de estudyante i entro en la fakultad de ‘Syensya politika’ i de ‘Derecho’.
No muncho mas tadre, eya izo su entrada en la majistratura i fue Ministra de la salud, komo tambyen de varyas otras kestyones sosyales.
Entre 1979 i 1982, Simone Veil fue la Primera Prezidente del parlamento Evropeo.
Es en el anyo 2008 ke eya fue akseptada komo myembro en la Akademia Franseza ande fue resivida kon solemnidad de parte del akademisyano Jean d’Ormeson.
Simbolo luminozo de la lucha para la ‘igualidad de derechos’ entre ombres i mujeres, eya parvino a triumfar en munchas de sus tentativas.
Durante su karyera politika, eya gerreyo partikularmente en favor de la libertad de las mujeres de interumpir sus estado de futuras madres.
Esta lucha fue por seguro la mas difisil de su karyera i puede ser la mas amarga, ma a la fin eya parvino a obtener la akseptasyon de parte del governo de ‘Giscard d’Estaing’, el kual al empesijo estava un poko ezitante.
A notar ke aun su briyante karyera politika, Simone Veil kedo syempre la adolesente de 16 anyos ke bivyo oras muy dolorozas en los kampos de eksterminasyon.
En un pasado no muy leshano, eya mizma avia dicho relativamente lo sigyente: “60 anyos despues del jenosidyo, so syempre personalmente persigida por los rekuerdos de akeya desgrasyada epoka, de las karas de las viktimas ke kaminavan en direksyon de la muerte, de sus djemidos i de sus gritos de espanto...”
Es ansi ke despues de aver kumplido las multiples funksyones sosyales de las kualas eya era responsavle, Simone Veil konsakro la mas grande parte de su enerjia a la “Fundasyon para la Memorya de la Shoah”, la kuala fue kreada en el anyo 2000 i de la kuala, sovre la demanda de Lionel Jospin, Primer Ministro franses de la epoka, eya fue la primera prezidente i mas tadre ‘la Prezidente de Onor permanente’.
Eya entonses avia pronunsyado estas palavras: “Tal todos mi semblavles, konsidero komo un dover de eksplikar sin kansarme, a las muevas jenerasyones i a los futuros reponsavles politikos, ‘de ke manera son muertos 6 milyones de djudyos’.”
Muestras sinseras kondolensyas i la ekspresyon de muestra profunda tristeza a todos los serkanos de una de las mas grandes Figuras del Djudaizmo aktual.
Ke su alma repoze en Paz.
