La plénitude de l’amour du prochain c’est simplement d’etre capable de lui demander ‘Quel est ton tourment?’. (La plenitud del amor por ‘el proksimo’ es simplemente de ser kapable de demandarle ‘kualo es tu tormento?’) - Simone Veil.
Myerkoles pasado el 5/7/2017 un Omenaje yeno de emosyon i de fervor fue manifestado a la memorya de Simone Veil de parte del aktual Prezidente de la Republika Franseza ‘Emmanuel Macron’, el kual anunsyo ke ‘en sinyo de agradesimyento del Puevlo Franses’ los Restos Mortales de Simone Veil ansi ke los de su marido seran transportados en poko tyempo al Pantheon.
En efekto, despues la Seremonia Relijyoza Djudia debasho la alta autoridad del Gran Rabino Hayim Koskia i de los diskorsos adekuados de sus dos ijos, Simone Veil reskapada por milagro de los orrivles “kampos de la muerte” resivyo los elojyozos post-mortuaryos los mas kayentes por los servisyos ke eya rendyo a su payis.
Komo ya lo eskrivi la semana pasada, entre 1979 i 1982 Simone Veil fue la Primera Prezidente del Parlamento Evropeo... Eya fue dos vezes, a datas diferentes, Ministra de la salud i partikularmente eya lucho para ‘la igualdad de derechos entre ombres i mujeres’ i sovre todo para la obtensyon en sus favor del derecho de pueder (en varyos kavzos de ovligo) interumpir medikalmente sus estado de ‘futuras madres’, lo ke en un pasado no muy leshano se azia segun formulas populares primitivas i malsanas, munchas vezes al presyo de sus vida.
Simone Veil se sintyo syempre ovligada de luchar kontra la indjustisya i la sufriensa, eya dediko su vida a ayudar no solo sus keridos i sus proksimos, ma tambyen kada uno de sus semblavles.
Ansi, es despues de aver kumplido las multiples funksyones sosyales de las kualas era responsavle ke eya konsakro la mas grande parte de su enerjia a la “Fundasyon para la Memorya de la Shoah”, la kuala fue kreada en el anyo 2000 i de la kuala, sovre la demanda de Lionel Jospin, Primer Ministro franses de la epoka, eya fue la primera prezidente i mas tadre ‘la Prezidente de Onor permanente’.
Segun un e-mail ke vyene de parvenirme de parte de muestro amigo Haim Vidal Sephiha ke agradesko sinseramente, “Simone Veil fue tambyen myembro del Alto Konsilyo de la Aliansa Israelita Universal”.
Mas de 700 personas fueron prezentes en su funeral, entre las kualas kaji la totalidad de los myembros del aktual Governo Franses, komo tambyen munchos de los presedentes, tal ‘Sarkozy’, ‘Hollande’, ‘Straus Kahn’ ets… De mezmo grandes personajes estranjeros i las mas altas personalidades de varyas institusyones Djudias i de varyos koryentes intelektuales.
La prezensya de “Restos mortales djudyos” en el Pantheon es un realsamyento del ‘Djudaismo’ en Fransia ansi ke la afirmasyon de su valor moral i espiritual.
