Este es un muzeo nasyonal, situado en Kanada, Manitoba, Winnipeg, en el sentro Forks en Down Town, djusto en medio, sentro Fransez i Inglez. Una arkitektura de afuera muy enterasante. Komo una agila (kartal) me paresyo. En la entrada, la primera koza ke mos enkontrimos fue el monumento de Gandi. La entrada i aryento kaminando de un etaj al otro me vino todo al tino el Yad Vashem en Yerushlayim. Kada etaj kon su propio sujeto. Filmos, objetos de emigrantes. Del mundo entero. No solamente ke vinieron a Kanada ma prinsipalmente de Kanada. En vezes en un etaj, avia eksposizyon de un artisto. En vezes de las eskolas eskpozisyones para protejar la naturaleza del mundo. Kamaretas para estudiar para las kreaturas, o para los estudiantes. Todo el lavoro para ser buenos umanos. En una pared del muzeo esta eskrivyendo, La prioridad del muzeo es: eksplorar el derecho para umanos kon espesialidad, ma no solo referiendose al Kanada ma a todos los umanos endjuntos, para adelantar, para entender, para respektar, para estar en dialogo kon el de enfrente. El mundo entero esta okupado kon los emigrantes. En la televizyon o en la radio no ay diya ke no se esta dando haberes, sovre los emigrantes. En vezes de un lugar al otro se estan indo sin permisyon, mujeres i kreaturas estan sufriendo en los kaminos. En vezes se estan indo kon dezisyon de las famiyas. Kon las kozas ke tyenen menester en un lugar muevo para mantenersen. Se estan aziendo emigrantes para tener una vida mas segura.
En el muzeo, ay etajes de buros ande munchas personas estan lavorando, para topar dokumentos del mundo. El ochen etaj se yama Israel Asper. De este etaj se esta viendo la sivdad entera.
Ken es Israel Asper? Es un umanisto, ke kon las ideas prinsipal, parvino a ke este muzeo se konstruye. El adreso del muzeo: 85, Israel Asper Way... En munchos lugares se esta nombrando este nombre. Despues vide una eskola grande de la komunidad djudia. I esta komunidad tambien se yama Asper Jewish Community. Me entereso muncho. Ken era este Israel Asper?
Del internet empesi a ambezarme. Israel Harold Asper nasyo en Manitoba, Kanada (1932) en una famiya emigrante de la Ukrayna, ke eran muzisyanos. Eskapo la Universita de Manitoba i en 1957 el se izo avokato de taksas. Se izo patron de su firma, Asper, Freedman & Co. en 1959. En el anyo 1970, eskrivyo el livro A Critical Analysis of the White Paper on Tax Reform in Canada. (Una analiza kritika del papel blanko de reformas en las taksas en Kanada) En el mismo anyo el se izo el shef del Partido Liberal de Manitoba. El siempre se okupo kon la politika. I despues se izo un grande patron de la media Winnipeg Televizyon, Radio i gazetas. No solo de Manitoba ma del Kanada entero. En 2000, la Universita de Manitoba troko su nombre a Asper School of Business. Syempre fue un miembro bueno de la komunidad djudia. Filantropo (iyiliksever), izo munchas kozas para el ospital de Winnipeg, para las eskolas de la komunidad djudia. Peno i fondo mas muncho para estudiantes. El suenyo suyo, ke era de konstruir el muzeo, no lo pudo ver. El muzeo se eskapo en 2008 ma se avrio kon una grande seremoniya en el 2014. El malorozamente peryo la vida a 71 anyos.
Agora ay un fondo de la famiya de Asper (The Asper Foundation) kon el kual estan kontinuando a azer bienfezensias. I un fondo djunto kon del governo de Kanada. (The CanWest Global Foundation) Estos dos fondos desde ke se formaron fin agora kaji $125 miliones se dio para los estudios de komunikasyon, para la salud, para la komunidad djudia. …. Tambien en Israel tyenen un estudio en la Universidad para el Holokost. Desde 1997, kaji 10500 elevos de eskola se edukaron. En Israel ay munchos lugares a ken estan ayudando. http://asperfoundation.com/the-asper-family/
Yo aki ke esto kontando no es nada de lo ke izeron. Puedeser vozos ya sintitesh o ya meldatesh sovre esta famiya. Ma para mi, en un viaje ambezar este kadar de kozas me izo sintir feliz una vez otra de ser djudia.
Djudio save dar, save mantener, save ir al futuro.
“Our strategy has always been to select the best projects that will make a difference…” Muestra stratejia fue de siempre eskojer los proyektos los mas mijores para azer una diferensia.
Israel Asper
