En Novembre 2005, selebrimos un evenimiento artistiko. Resivimos por la primera vez en Estambol, las ovras del artisto kubisto Pablo Picasso, el mas reputado del siglo vente, grasias al Muzeo SAKIP SABANCI.
Este muzeo situado en la kosta Evropea del Bosfor, mos ofrese su ekspozision, ansi ke su ermoza vista panoramika de la kosta Asiatika.
Despues de azer grandes kolas, tuvimos la oportunidad de admirar las epokas de Picasso:
- El Blu i el Roz (1901-1907).
- El kubizmo: “Les demoiselles d’Avignon” (1906-1907), The Museum Of Modern Art (New York)
- Ekspresionizmo “Guernica” 1937, (Muzeo del Prwado).
Picasso es un maestro Espanyol de inspirasion inovatora. Fasinado por la seksualidad en su vida i tambien en su arte, kon la pluma, el pastel, la akuarela, mos fiksa las senas de amor, kon sus formas jeometrikas.
Aunke antes de el, Titiano, Ingres, Poussin, Corot, ets., nombrozos fueron los pintores interesados por este sujeto, Picasso no areto de selebrar Eros.
Una ekspozision de 300 ovras reunidas en Paris en 2001 “Jeu de Paume” mos revela el artisto, fin akel tiempo deskonosido “Picasso Erotique”.
SU VIDA: Pablo nasio en Malaga. Amorozo del desen deste su chikez, no desha el kalem de su mano. El arte lo pasiona. Akompanya su padre, profesor de arte en Barcelona. Estudya en la Eskola de Beyas Artes. En 1904 se instala en Paris.
La vida burgeza kon su esposa Olga toma fin en 1930. Dora Maare fue su grande amor i tiene grande lugar en su vida.
Eleva del fotografo Ray Man, artista eya mizmo, pusha Picasso en su ovra GUERNICA i fotografiya los epizodios de este tabló.
Picasso, despues ke alkansó a su notoriedad, se permetio todo modo de fantaziyas i no se privo nunka.
Las “heliogravures umoristikas” (1957), ekspozadas en el muzeo de Barcelona en 2001, donde la ovra de “Esther Williams”, la sirena de mar, artista de sinema, es un egzemplo karakteristiko de su fantasiya.
El grande Andaluz Picasso mos demostra ke si no fuera su akademizmo i su “savoir faire” figurativo, no seriya tan famozo.
Kon su pulsasion violante i profunda, tuvo el poder de no konformarse a lo ke es abitual, azer akseptar el Kubizmo i avrir la puerta a otros novedades.
