A muestro muy kerido amigo de grande valor “Sami Kohen”, muestro dezeo el mas sinsero de una rapida i kompleta mijoria de su Salud.
En este momento una de las kestyones ke obsedan kontinualmente munchos de los dirijentes i tambyen sitizanos djudyos de Fransya es: Deke Sara Halimi, aedada de 65 anyos, pediatra diplomada i ansyana direktrisa de una chika “guarderia de ninyos” (bebek yuvası), topo la muerte tres mezes antes a la sigida del akto loko de uno de los moradores muzulmanos de un edifisyo vezino, el kual en las oras las mas obskuras de una noche del mez de Avril pasado, avia entrado en la morada de la viktima ke estava profundamente durmyendo, la desperto, la torturo i la echo por la ventana del treser nivel de altor del edifisyo ande la povereta mujer morava?
El drama fue perpetrado en uno de los baryos ke fueron kaji syempre unos de los mas peligrozos lugares de la Kapitala Franseza i ande kaji todos los moradores eran ansyanos migrantes, a la eksepsyon puede ser de una sola persona “la viktima”.
Segun lo ke kontaron varyos vezinos, los kualos probavlemente no tuvyeron el koraje de intervenir, el matador avia torturado la viktima durante un largo momento en gritando “Allah akbar”, i tambyen (en lingua araba) Tuve la fuersa de matar el Sheytan”.
Ke fue la verdadera razon de este akto? Deke en supito este odyo al pareser sin razon? Deke este orgolyo loko i este menester imperyozo de venser absolutamente el otro ke si mizmo?
Por seguro muevas kestyones seran tambyen formuladas. La primera sera “Deke a esta ora tardiva de la noche este ombre sintyo el menester imperyozo de verter sangre?” I la segunda: “Por ke motivo la Polisia ke ya konosia el matador i ke ya savia ke era un ombre mentalmente dezekilibrado, inkapavle de dominar sus impulsyones, no lo konsidero komo un peligro para su entorno i no le prodigo la vijilansya menesteroza afin de no permeterle de perpetrar kualkyer danyo a uno de los otros moradores?” I enfin una otra pregunta: ‘Es ke el matador i su viktima se konosian de serka?’
De su parte, el avokato del akuzado afirmo ke su kliente niego kategorikamente kualkyer motivasyon antisemita. I a mozotros de demandarmos ‘asta ke grado esta afirmasyon reflekta la verdad’.
Byen entendido el kulpavle fue immedyatamente arrestado i internado en un ospital psikyatriko antes mizmo de ser djuzgado i es solo tres mezes despues ke, el 12 del mes koryente, el fue interojado de parte de los djuzgos de Instruksyon por ‘omisidyo voluntaryo’, sin azer mensyon de un probable ‘antisemitizmo, aun ke (komo dicho mas arriva) syertos vezinos avian oyido el matador gritar; “Allah akbar, mati al Sheytan”.
Oy en dia, tres mezes despues del muy triste fakto kriminal, interojado de parte de la AFP, Francis Kalifat, prezidente del CRIF (Konsilyo reprezentativo de todas las Institusyones Djudias de Fransya) no se detuvo de ekspresar su inkomprehensyon i byen entendido su deziluzyon kuando los djuzgos de Instruksyon deklararon ke el kulpavle sera djuzgado unikamente por aver matado su viktima, sin azer mensyon de un posivle “motivo de antisemitizmo”.
Es ke esta probable posibilidad sera estudyada mas tadre durante la evolusyon del procheso? Ninguna mensyon de una semejante intisyon fue echa a este sujeto.
Si no me yero, durante la Vijita de Binyamin Netanyahu en Fransya, el avia avlado al sujeto de este drama kon el prezidente Emmanuel Macron, el kual (me parese) avia respondido ke iva si posivle estudyar personalmente este kavzo.
Ma, no mos olvidaremos ke en Fransya komo tambyen en otros payizes evropeos “la Djustisya” es una institusyon otonoma, libre i sola responsavle de sus desizyones.
