Si, kualo es en realidad el Vente i unyen siglo? Una epoka de muevas invensyones syentifikas i de progreso sosyo kultural? O byen de salvajeria?
Kuando es ke la persona va finalmente entender lo ke realmente es “bivir”? Kuando es ke eya va akseptar lo ke es “ser una de las kriansas pensantes ke se topan sovre tyerra” i ansi va achetar i komprender lo ke es la sagralidad de los derechos de los otros i los doveres ke mos inkumben?
En desparte de esto (komo puede ser ya vo lo tengo dicho i ke kontinualmente repeto) munchos filozofes i savyos de la antiguidad mos ambezan ke la real verdad no se topa en el ekseso ni en kualkyera manera absoluta de ver i de djuzgar lo ke se pasa en muestro entorno, ma simplemente en un esforso de refleksyon profunda echa de voluntad de komprensyon i de entendimyento.
Tal lo ke meldimos la semana pasada en la prensa internasyonal: El refuzo de Donald Trump de kondanar frankamente i sin ningun ekivoko, las manifestasyones de los ultra nasyonalistos zenofobes i antisemites del payis del kual el es aktualmente responsavle, provoko una atmosfera de ravya mesklada de dubyo en el payis i mizmo fue la kavza de una grande kuantidad de demisyones de parte de munchos grandes industriales ke avian puede ser sin reel konviksyon votado en su favor durante la ultima eleksyon prezidensyal i ansi avyo tambyen la puerta a multiples kontroversas al seno mizmo de su propyo partido.
Kaji kada dia, muevas partensyas son anunsyadas no unikamente por diverjensya de djuzgamyento o de opinyon, ma por kavza de la fuerte inkoherensya de refleksyon del prezidente el mizmo.
El grande yerro de Donald Trump fue de meter al mizmo nivel de kulpabilidad dos grupos no solo diametralmente kontraryos en sus aspirasyones sosyales, ma kontraryos el uno al otro en sus manera de afirmar sus vizyon de la situasyon.
Los demokrates se avian aunado para gritar en sinyo de protestasyon kontra la multitud de indjustisyas ke fueron anunsyadas, myentras ke los ultra nasyonalistos eran pushados por un real dezeo de eksterminar sus adversaryos, lo ke provoko la muerte de una manseva de aproksimativamente trenta o trenta i sinko anyos ke se avia moralmente sentido ovligada de enalteser la boz en sinyo de protestasyon.
Ke va ser el rezultado de este fakto al pareser kaji trajiko en su konfuzyon?
Dyes i ocho (18) grandes demokratos djudyos de los Estados Unidos demandan aktualmente al Prezidente Amerikano de luchar kontra la indjustisya i el inmenso odyo de los zenofobes.
Eyos afirman ke la opinyon prezidensyal sovre la pretendida igualidad de responsabilidad de los dos partidos adversos ke se afrontaron en “Charlottesville” endika una absensa fundamental no solo de lojika ma tambyen de verdadera sensibilidad.
De su parte, Jamie Raskin, myembro del kongreso demokratiko djudyo, dize ke meter al mezmo nivel de moralidad ‘los ultra nasyonalistos’ i los ‘anti-fashistos’ ekivale a permeter manifestasyones neo-nazis.
A la okazyon de este evenemento, una pregunta (sin ninguna relasyon kon el kavzo aktual) mos vyene otomatikamente al esprito: ‘Es ke en el futuro, en los Estados Unidos de la Amerika, los patrones de las inmensas fabrikas de armas van syempre kontinuar a enrikesersen al detrimento de inosentes ke pyedren la vida en asaltos djihadistos?
Es ke estos rikinyones ke no tyenen las manos muy limpyas todo en azyendo grandes donasyones a ovras filantropikas, no resyenten remorsos kuando en la prensa es anunsyada la muerte de syenes i syenes de desmazalados eksterminados sin kulpa ni razon?
En efekto, a penas dyes dias despues de lo ke se paso en la sivdad nombrada “Charlottesville”, djueves i vyernes pasados el 17 /18 del mes koryente, dos muevos asaltos djihadistos en Espanya oskuresyeron ainda mas la atmosfera de muestra epoka.
Es ke la “la Kriansa Umana” ke pretende no ser solo dirijida por sus reaksyones instinktivas i ke munchas vezes se afirma komo una persona konsyente i responsavle de sus aktos, esta sovre el punto de abokar kavesa delantre una fatalidad invensivle.
