Este fin de semana pasada tuvimos una grande reunyon en el Şalom. Todos los ke eskriven en la gazeta fueron invitados a esta reunyon ande el mas importante sujeto fue el 70en aniversario de la gazeta ke se va selebrar este anyo! Komo ya savesh, el Şalom es la unika gazeta de la komunidad Judia de Turkiya, la dalkavo gazeta ke kedo despues de la Republika. El Şalom se fundio por el Sinyor Avram Leyon (z”l) en 29 Octubre 1947 i el Sr. Leyon la kontinuo asta ke su salud no le permetio mas de azer lo ke estava aziendo: kontinuar un legado de la lingua i de la palavra eskrita. En el anyo 1984, el muevo Şalom aparesyo, el Şalom ke konosesh todos oy, lo mas en lingua turka kon una pajina solo en judeo-espanyol. Kuando Avram Leyon ya no pudo mas kontinuar su lavoro, transfero sus derechos a la administrasyon de la komunidad i es ansi ke el muevo Şalom devino la gazeta de la komunidad judia. En los anyos ke sigieron, el Şalom se desvelopo un poko mas de dia en dia, i oy se puede dizir ke es una gazeta al nivel mundial kon sus haberes, artikolos, autores mansevos, sus suplementos maraviyozos ets.
En la reunyon, el Sr. Ivo Molinas tomo la palavra i mos konto de los planos de selebrasyon del 70en aniversaryo de la gazeta. El aniversaryo se va selebrar el 14 de Disiembre 2017, un dia de jueves por la tadre. Esto deshando las surprizes de akel dia a una otra vez!
