Avezes la istoria se desvelopa en una manera estranya. En estos dalkavos dias, uvo eleksyones en el UNESCO para eskojer el muevo presidente de esta organizasyon. Estava siguro ke un kandidato arabo se iva eskojer a este posto ama las kozas no fueron asi. El konflikto entre los paizes arabos, espesialmente entre la Saudi Arabia i el Katar divizo los votos arabos i de ayi salio la kandidata franseza, Audrey Azoulay, sefaradi de origin Marokana, i eya tomo los votos nesesarios para ser presidente del UNESCO! Este evenimiento sorprendio a todos, la verdad dizir porke en todos los haberes ke meldi a este sujeto, el tono estava de sorpreza. Esto fue una fin de eleksion inasperavle ma para mozotros los sefaradis del mundo, una ermoza sorpreza. Para mi, Audrey es tambien una mujer i siempre me plaze ver a mujeres fuertes, en postos buenos, ke esto sigura ke se lavora mas muncho de un ombre para reushir. Audrey viene de una famiya de diplomatos. Su padre, André Azoulay, fue el konsejero de los reyes de Maroko durante munchos anyos i el establesio relasyones buenas entre Maroko i Israel. Felisitamos a Audrey Azoulay por su muevo posto i le auguramos todo modo de reushita!
