“SHALOM” a la anyada mueva 5778 (2018); ke seyga una anyada yena de pas i amistad para el mundo entero, i yena de sanedad, felisidad i prosperidad para todos mozotros.
“Vinido bueno i klaro” i ke todos los problemas de todos los paizes del mundo entero se terminen sin negriguras, sin terorizmo, sin gerras, sin azer mal al den frente, kon kerensya, tolerensya i muncha pasensya.
“Bivir i ver”!...
Agora kero dar a entender la sinyifikasyon del byervo “SHALOM”.
Kuando por egzempyo kaminando en la kaye se ve a un konosido, i kon una kara yena de sonrisa se saluda en dizyendo Shalom; el den frente toma el saludo kon grande amistad.
Shalom es un saludo en ebreo, i kada letra eksprime un sentimyento.
Sanedad, Umilidad, Armoniya, Liberasyon, Ovedeser (itaat etmek) i Mizerikordya (merhamet).
Shalom sinyifika, Pas, Trankilidad, Saludo, Repozo, Kalmo, Kompletar i Kompensar (telafi etmek).
Komo de byervo emportante kon todas estas sinyifikasyones!
Shalom es el nombre de Shlomo Ameleh. Shlomo es Shalom. “Shlomo Ameleh” para azer el shalom kon los paizes vizinos, se kazo kon munchas mujeres de estos paises. Su primera mujer era la ija del faraon (firavun) de Ejipto.
El amor ke bivyo kon sus mujeres, trusho la armoniya kon estos paizes.
El Shalom es bazado sovre las mujeres.
Ya savemos ke “La mujer aze, la mujer dezaze”.
Si ay por egzempyo una despartisyon de ideas entre los myembros de una famiya, es la mujer ke mete el orden entre eyos.
Kuando se bushka kon telefono, se demanda komo esta el den frente, los myembros de su famiya, la sanedad i munchos otros detalyos se topa para avlar.
Ma, kon el e-mail, SMS, whatsapp i otras fasilidades teknolojikas, se transmete las novelas solamente kon tres byervos, i si es una novela negra, por egzempyo de un funeral ke no estamos asperando, mos esta azyendo pena, sin pueder avlar! Komo de tyempo ke vinimos!
Es verdad ke la teknolojiya trusho munchas fasilidades, ma yevo i munchas otras komo la sensibilidad, i el respekto de eskrivir.
Mizmo saludar al den frente esta difisil para unas personas ke no tyenen la uzansa ni de dar una sonriza enriva los mushos, ni de meneyar la kavesa, u avlar kon los ojos, u el puerpo, ni mirar las karas. Dingun sentimyento malorozamente!
No es emportante avlar dos palavras, ma no saludar es una kualidad de los Estambullis!
El den frente kale ke tenga una personalidad, u un lugar emportante en muestra komunidad para pueder azer una konversasyon i diskutir.
Este modo es el komporto de muestro puevlo. Grandeza ke no tyene fin. Todos tenemos problemas diferentes en muestras kazas. Ma la Kerensya es un konsepto ke te da la fuersa de kontinuar a bivir kon todas las difikultades de la vida.
Saludar es Salud i Pas.
Kuando se dize de aryento el korason, kon kerensya Shalom, el den frente pensa ke ay en este mundo maraviyozo, una persona ke te esta dando la valor ke mereses, i ke te esta apresyando.
Lo ke mos kaye de azer es de enalteser la Kerensya entre todos, i azer todo modo de buendades al den frente; para ke la jenerasyon vinidera tome este egzempyo.
Todos ya savesh ke tenemos un jurnal “ŞALOM” publikado kada semana en Estambol i el es meldado en el entorno del mundo entero kon su pajina del djudeo-espanyol.
Mozotros daremos apoyo a este jurnal para ke prospere i ke adelante.
Kuando egziste el amor i la fidelidad entre las mujeres, sin ambisyon i sin selo, no ay koza ke no se puede azer i reushir.
Kedavos syempre Keridos Lektores; kon la luz de la Kerensya i de la Amistad.
Shalom a todos...
