ANET PASE i Elda PASE Üretmen
En el sur, en el oriente, ay una gerra kayente. No vos va eskrivir DE KE? Los eskrivanos politikos ya estan eskrivyendo kada dia una kritika sovre este mal ke esta azyendo un efekto negro en el mundo entero. Desde ke empesaron estas dezgrasias, se murieron miles i miles de mansevos, mansevas, kreaturas. Se derrokaron las sivdades. Los ke estan topando posibilidad de fuir de la gerra estan en los kaminos. Si tienen posibilidad ekonomika o de bivir en otra sivdad konvenivle, estan bivyendo. Ma en todo kavzo, no se esta eskapando las informasiones ke estan vinyendo sovre estos proveretos. Solo en Estambol yo ke veyo, kada sinko metros, ay una provereta/o kon un bebe en el braso. Pujo la suzyedad. Pujo la vida. Pujo la populasion i la tansion de los moradores. Komo Estambol, me imajino ke ande se estan indo estan trokando la vida. Ni los moradores, ni los imigrantes keren esta vida. Todos keren bivir kon sus onores. Estan pasando miles de djente, de enriva de Turkia a la Evropa o a la Amerika. En los kaminos las kreaturas se estan muryendo. O estan kayendo a las manos de las mafias.
En el mez de Junio ize un viaje a Kopenhag por dos dias. En el sentro de la sivdad enkontri a las paredes del Muzeo Kunsthal Charlottenborg.
Aviya una enstalasyon sovre “El Dia Mundial de Los Imigrantes”. Las paredes del muzeo estavan kuviertas kon la enstalasyon del artisto Chinezo, Ai Weiwei.
Lo ke impresiono fue ke la ovra fue echa kon los jiles de salvavidas de los 14000 refujiados ke vinieron a la costa de la izla de Midilli. Los datos de las Nasiones Unidas dizen ke del empesijo de 2017 fin agora 77.000 imigrantes pasaron del Mediterano a la Evropa i kaji 2.000 de estos se murieron o se desparesiyeron. La dezgrasia fue ke pasando los dias, los muertos se estan azyendo solo un numero. Por egzemplo, en dizyendo oy se muryo sinko personas. El direktor Thouber (2017), del muzeo Kunsthal Charlottenborg, esta kontando la razon de esta enstalasyon, “kuando las personas o los politikos no ven mas la kriza umana, los artistas azen remarkas al mundo”. Estas palavras me vino komo un shamar a la kara para estar siempre despierta. Esto es un grito al mundo, un protesto del arte.
Despues meldi un artikolo de Yenal Bilgici en la Gazeta Hürriyet de Julio 30, 2017. http://www.hurriyet.com.tr/berlinin-yeralti-kralliginda-bir-multeci-superstar-40534580 El izo una entrevista muy enteresante kon el artista Ai Weiwei en Berlin. El artikolo era sovre los penseryos i la vida del artista. Por ultimo el Muzeo Sabancı lo resivio en Septiembre. Una eksposizyon grande en tres etajes. Tuna Saylağ eskrivyo sovre la ekspozisyon kon munchos detayes en Oktubre 25, 2017 en la gazeta Şalom. El artista produsyo chinis i vazos de porselenes i por esto la ekspozisyon fue en Sabancı. El desino enriva de los chinis sovre los imigrantes ke vinieron de las frontieras Egeas. Produsyo papeles de paredes. Vos konsejo de ir i ver estas ovras.
Todos azemos lo ke mos viene de la mano. Lo importante es de azer personas umanas. El eskritor kon las palavras, el artista kon el arte, el politiko kon las avlas. Si no puedemeos azer afilu nada, puedemos apoyar (destek olmak) a las personas ke estan echando el grito al mundo kon muestros aplauzos (alkışlarımızla).
