La semana pasada, una amiga ke es ensenyante en la Universidad de Viena me envito a azer una avla en Ladino a sus elevos de 20 a 30 anyos. Es la fakultad de filolojia i de los estudyos kulturales en la seksyon de las linguas Romanistikas. En esta universidad, se interesan en las linguas ke estan desaparesyendo komo el Ladino, el Mongol, el Jitano (çingelerin dili) i munchas otras.
Viena es la kapitala de la Austria i en mizmo tyempo es la kapitala del arte, i del entelektualizmo. Es la mas grande sivdad yena de djente ande biven dos milyones de personas. Una sivdad rika de kultura, yena de museos, palasyos, statuas en las fraguas, munchas ovras istorikas, arte, konseres i una sivdad muy sivilizada.
El sujeto de mi diskorso fue lo ke kijyeron los elevos: “La vida de los djudyos antes 50 anyos en Estambol, ande biviyan, los sentros ke moravan, komo biviyan, kualo era el vizindado, la ermandad, las relasyones de las personas i las tradisyones de los djudyos, las fyestas, el konsepto de la famiya” ets…
Despues del diskorso ke duro una ora, las demandas fueron enteresantes i fui muy maraviyada de ver la edukasyon i los puntos de entereso de estos mansevos.
El palasyo de “Schönbrunn” es emportante porke los monumentos kulturales (kültürel anıtlar) los mas emportantes del pais se topan aki.
La arkitektura manyifika, las guertas son koza de ver…
En el palasyo ay 1.200 kamaretas de vijitar i el zoo (hayvanat bahçesi) el mas grande de la Evropa se topa aki. Pasar un dia entero aki fue muy agradavle para mi i muy enteresante.
El palasyo “Belvedere” es una struktura (yapı) presyoza de Viena. Es konstruido en el stil Barok kon munchos ornamentos (süsler). Las skulpturas en formas umanas (insan şeklinde heykeller) estan mantenyendo el techo (tavan) en la sala grande. Las broderias, las eskaleras muy grandes, los freskes ekstraordinaryos muy empresyonantes.
Las guertas yenas de pisinas ornamentales (süs havuzları), las fuentes ornadas de skulpturas diferentes kon la istorya de los monumentos estan amejorando (geliştirmek) muestra kultura.
El treser dia vijiti “Salzburg” ke es la sivdad de “W. Amadeus Mozart”. El senso de Salzburg es: El kastiyo de sal” (tuz kalesi). Una sivdad chika, turistika de 150.000 personas djusto en medyo de la Evropa, ke esta vijitada por sinko milyones de personas kada anyo.
La kaza de Mozart, el palasyo de Mirabel kon sus jardines, la katedral de Salzburg ke se konstruizo en el anyo 1611 es un edifisyo somptuozo (ihtişamlı) echo kon el stil Barok.
El kastiyo de Salzburg es el mas alto de la Evropa entera.
De ariva se esta vyendo un panorama impressionante de esta sivdad yena de vedruras i de rozas multikolores.
La avenida de Graben es una de las mas famozas de Viena. Las patiserias, los magazenes, los kafes, i la djentorya, los turistos de las kuatro partes del mundo, una kaye yeno de movimyentos, musica i entretenimyento (eğlence).
Los konseres klasikos i muy diferentes los unos de los otros en los salones, palasyos, eglisyas i en las kayes unos mas ermozos de otros…
El museo de “Sigmund Freud”, enteresante sovre las antikas, las skulpturas chikas, sus livros, su kamareta ande aziya la terapia a los hazinos, la kaza ande bivyo, su meza ande lavorava, i los livros ke eskrivyo muy fasinante.
El museo de los djudyos unos de los mas enteresantes ke se konstruizo en 1896. Los byenes ke aparteniyan a los djudyos, dokumentos relijyozos, los tablos, las fotos todo esta ekspozado de una manera ordonada ke esta mostrando la kultura djudiya del pasado al presente (geçmişten bugüne kadar)…
Las kalejas ande biviyan los djudyos djusto komo un ghetto. En el entorno vide una sinagoga serrada ke se avre de vez en kuando los shabates.
Kaminando en una de las kalejas rankontri una sinagoga ande aviya una bar-mitsva i las dammas kon chapeyos estavan salyendo. Uno ke estava protejando la puerta, despues de miles de kestyones me desho entrar.
Una sinagoga veramente muy grande, ermoza i ekstraordinarya.
El merkado (Pazar yeri) de la sivdad entornado de kafes i restorantes tipikos ande se esta bevyendo i komyendo diferentes savores kon vendedores turkos ke estan dando a gostar todo modo de salados i dulsuryas.
La ekonomia, el komerso i la endustria depende del turizmo. Es el sentro de la muzika del mundo. “Mozart”, “Beethoven”, “Schubert” i munchos otros muzisyenes bivyeron en esta sivdad i lavoraron aki fina la fin de sus vidas.
Viena fue elejida (seçilmiş) la syetena vez la sivdad la mas abitavle (en çok yaşanılabilir şehir) del mundo entero.
Una sivdad rika ke tyene un nivel alto de bivir. En mizmo tyempo una sivdad kara. Los muzisyenes famozos: Mozart, Beethoven, Schubert, Haydn, Strauss…
Los artistos del sinema: Romy Schneider, Arnold Schwarzenegger…
Los siantifikos: Albert Einstein, Sigmund Freud…
Los eskrivanos: Kafka, Stefan Zweig…
Fue un viaje fruktuoso i inolvidavle para mi, una eksperiensa diferente viajar sola.
