La inaugurasyon fue la noche del 13 de Noviembre 2017. En la meza inaugural estava el Sr. José Ignacio Ceniceros, presidente de La Rioja i de la Fundación San Millan de la Cogolla; el Sr. Juan Manuel Bonet, direktor del Instituto Cervantes; el Sr. Miguel de Lucas, direktor del Centro Sefarad-Israel i la Sra. Carolina Aisen, direktora de la Federación de Comunidades Judías de España. Todos avlaron sovre la importansia ke tiene San Millan de la Cogolla, la kuna de la lingua espanyola i tambien el importante rolo ke la lingua judeo-espanyola i la kultura sefardi siempre tuvo en las aktividades de esta institusion ke este anyo esta selebrando su venten aniversaryo. El Centro Sefarad-Israel tambien esta selebrando su aniversaryo este anyo: el diezen. Siguro ke se avlo tambien de la ley de la nasionalidad de 2015 i del retorno de los judios sefardis a “Sefarad”. El Sr. Juan Manuel Bonet izo la konferensia de inaugurasyon i dyo un rezumen de la istoria de los sefardis a traves los eskritores espanyoles. La ekspozisyon en la sala grande tenia munchos livros, megilas ets. de Purim inkluyendo artikolos de “los otros Purim”, uno de los kuales es la Megila de Hitler. Esto sera para a semana ke viene de kontarvos.
