“Limmud” es un festival de kultura. El dalkavo se organizo el 12.11.2017 en la eskola “Ulus Musevi Lisesi” en Estambol. Es el tredjen anyo ke se esta organizando de una manera perfekta, en reushendo a trayer personas, profesores de grande valor, emportantes en sus espasyos i dando la emportansa menesteroza a todos los detalyos.
La sinyifikasyon de “Limmud” es “ambezar, estudyar”. El buto es ambezar kon la partisipasyon de la persona i dar la okazyon de developar muestra identidad.
Limmud ambeza a los partisipantes a partajar la konosensya sin asperar nada del den frente. Developa la identidad djudiya i arrezya (güçlendirmek) la kultura. Es una kolektividad de estudyo ke da a la persona un punto de vista diferente a lo ke es auzado.
Shabat la noche, despues de un kokteyl, Igal Zakuto izo un diskorso de avyertura en turko i en inglez, presentando los ke van a avlar. El motto, el sujeto de este anyo de este festival fue: “Tengo Un Sonyo” (bir hayalim var).
Uvo 4-5 mansevos ke avlaron sovre este sujeto, ma el mas perfeksyonisto i el ke me plazyo mas muncho kon su atitud aktiva, kon su avla segura de si mizmo (kendinden emin) fue la avla de Avi Alkaş, ombre kultivado, muy savido, reushido en su lavoro. El gano el premyo (ödül) en el anyo 2010 “Premyo de Servisyo Superyor Mondyal” (Dünya Üstün Hizmet Ödülü).
Avi Alkaş, en su avla, disho: “El buto de reushir en el lavoro es produizir. Saver munchas linguas, komunikar kon las personas de una forma simple. No kale peryer tyempo, kale lavorar duro, el buto deve de ser la felisidad. Kale partajar i dar sin asperar kualker koza del den frente. La edukasyon es el punto el mas emportante i deve de ser kontinualmente ensenyar (öğretmek), edukarse i prosperar, amejorearse a si mizmo (kendini geliştirmek).” A la fin mos dyo un egzempyo, una dicha de Konfuchyus: “Él ken no se da la pena de kansarse para ambezarse en su manseves, no le keda nada de ambezar en su vejez”.
Alhad demanyana la primera konferensya ke asisti fue la de mi ija, Esra Gaon Akkohen. Esra tyene una eksperyensa de 15 anyos en “Microsoft” en el espasyo de “Human Resources” - Manaderos Umanos (İnsan Kaynakları), i oy es la asistante del dirijente jeneral de Turkiya en este sujeto.
Esra Gaon en su avla disho: “El kriter el mas emportante para tomar una persona a las empresas enstitusyonales (kurumsal şirketler) es el kriter de la performansa, de la reushitad. Kale pueder dirijir el trokamyento (değişimi yönetmek) para pueder kontribuir (katkıda bulunmak) al lugar ke estamos. El trokamyento dijital (dijital dönüşüm), la kapachidad, tomar al lavoro la persona derecha, la reushidad individual, esto todo desho el lugar al lavoro de ekipo (ekip çalışması). La mentalidad de evolusyon, la kultura, no fuyir de la lucha (mücadele), akseptar las kritikas i lavorar kon korason i kon las ideas del ekipo entero es la baza de la reushidad”.
Despues asisti a una konferensya del Prof. Dr. Acar Baltaş intitulada: “Dar el Meresimiento a la Vida” (hayatın hakkını vermek). “Para sintirmos orozos, tenemos menester de moneda, de poder (güç), de sanedad i munchas otras kozas… Aser ke las difikultades, las tristezas, las angusyas (sıkıntı), las preokupasyones (endişe) azen el umano una persona (insanı insan yapar). Para pueder reushir en la vida kale azer lo ke keremos, lo ke mos plaze, lo ke muestro talento (yetenek) permite, la ambisyon de reushir i mostrar entereso amistozo a las personas, demandarles si tyenen menester de una koza, i apartarles tyempo para oyirlos. Kuando mos olvidamos del tyempo ke esta pasando azyendo kualker koza, es el amor de la reushidad”.
La konferensya de Mümin Sekman, intitulada “Todo ampesa kon ti” fue enteresante i satisfezante. Spesyalisto de la evolusyon individual (kişisel gelişim uzmanı), para el la reushidad es el resultado de la fuersa, de la voluntad, de la kreensya, de la konfiensa, del esforso i del lavoro kontinual.
A la fin asisti a la avla de Serdar Devrim, el jurnalisto, kon Ahmet Eryılmaz, el avokato sovre el sujeto “Edukasyon de las Kriyaturas”. Avlaron en analizando unos kuantos livros i komparando las diferensyas de las ideas, de los eskrivanos sovre la edukasyon kon diferentes puntos de vista. Estava muy enteresante. Los dos se toparon en la mizma desizyon ke la formasyon (eğitim) es la relasyon de las madres kon los padres i los ijos aryento de kaza. Terminaron sus avlas kon repuestas a las kestyones ke les demandaron.
Fue un diya yeno de saveduria (bilgi), byen organizado, kon muncha djente i muy reushido.
Kero felisitar a todos los ke lavoraron de alma i korason, kon grande voluntad para esta grande organizasyon.
Fueron kapaches i muy metikulozos (özenli) para elijir (seçmek) los profesores etranjeros envitados, para resivirlos i okuparsen 3-4 dias kon eyos fina sus partensyas.
Fue un dia enteresante, fruktuozo, koryendo de klasa en klasa, abashando i suvyendo las eskaleras para alkansar i no peryer ni un punto de las konferensyas…
El Dyo ke mos ayege, para kada anyo mijorado, kon todos endjuntos, kon sanedad, parnasa i felisitasyones a todas las voluntaryas i voluntaryos ke organizaron este dia inolvidavle i yeno de saveduria…
