La semana pasada tuve la okazyon de asistir a una klasa de Bachata kon mi ija en Madrid. Mi ija me dize ke este baile esta muy muy popular en Espanya i es vedra. A lo ke vide, Madrid esta yeno de salones ande se ensenya este baile i despues se azen bares para ke la djente ke vienen puedan bever i bailar en mizmo tiempo. Muy kurioza de ver komo de personas vienen a estas sesiones (i un poko porke so madre judia i kero kontrolar lo ke aze mi ijika!) me fui kon eya a esta sesion. En primer lugar, devo dizirvos ke los salones estan grandes i espasiozos. Ay djente de todo modo de edad, mansevos komo de edad media (para no dizir viejos!), mujeres i ombres de todo tipo. Mi ija me disho ke en este baile es lo mas la kapachidad del ombre ke konta; la mujer solo esta para ermozeyar la vista. I de verdad, las mujeres todas vinieron kon kalsados spor ma kon unas chantas yenas de kalsados de bachata i de otras vistimientas para ermozeyar el baile. Si aviya un ombre ke bailava bueno, era un plazer de verlos al kupl bailar ama si el ombre no bailava ermozo (ke en lo mas de kavzos, paresian a kyutukes en pies!) la mujer mizmo si era muy ermoza, el baile no estava nada de ver. Las klases son muy buenas. Adelantre los profesores (un ombre i una mujer) azen azer egzersisios para ke la djente se kaynten, movimientos basikos del baile. Kuando un grupo grande aze el mizmo movimiento, se toma grande plazer. La muzika es muzika latina, ke me plaze muncho i el baile es entre el tango i la salsa. La bachata es mas presto del tango ama mas avagar de la salsa. Todos bailan kon todos en un grande sirkulo ande los ombres kedan en el mizmo lugar i kuando el profesor grita “kambia”, las mujeres se transferan al ombre sigiente. Este modo, todos tienen la posibilidad de bailar kon todos. Muy ermozo. Yo me engleneyi muncho akeya noche porke estuve observando i ambezandome este baile popular. Vos rekomendo de mirar videos de bachata en el YouTube.
