Desde munchos anyos konosi de serka la Sra. Nuriye Franco, z”l. Teniyamos munchas okazyones de enkontrarmos en famiya. En el derredor familyal, la yamavan Nurika i fue kon este nombre ke, anyos antes la konosi. Kuando mos topavamos en alguna reunyon de famiya, yo me adresava a eya en tal ke Mme. Franco. La vez de alkavo ke mos vimos fue en el Neve Shalom, myentres los funerayes de muestra regretada Klara.
Klara Perahya i Nuriye Franco... Dos amigas, dos Ladies ke tuve la shans i la onor de konoser de serka. En paz ke repozen. AMEN. El nombre de Klara z”l, yo lo sinti antes munchos anyos, sin konoserla de serka. Ma, de akel tyempo sintiya sus bienfezensyas. Naturalmente, akeya epoka yo no era dayinda miembro de la ancha famiya del Şalom, en tal ke eskritora. Era simplemente una lektora de muestra Gazeta. Portanto, devo apuntar ke, el Şalom syempre estuvo en mi vida. Esto ya lo eskrivi en ancho en mi artikolo del 25 0ktobre.
En la mezma pajina, muestra amiga Esti Saul eskrivyo su konosensya kon la Defunta Nuriye Franco. Aki, me parese ke devo eksplikar muestras relasyones familyal kon la Famiya Franco. La sigunda ija de Nuriye Franco es kazada kon el onkl de mi ermuera. Ansi, tuvimos munchas okazyones de enkontrarmos. Naturalmente ke mos va mankar... Tambien komo mos esta mankando a todos muestra kerida amiga, Klara Perahya.
No me esto pudiendo auzar a la idea ke peryimos muestra grande amiga, muestra kerida ermana, la infatigavle Klara… Syempre uzava a dizir “El judeo-espanyol es la mas presyoza valor tradisyonal ke mos desharon muestros ansestros.” Eya syempre fue un model para mozotros.
El mas dulse rekuerdo, el mas alegre ke tengo es del diya ke lavorimos en su kaza, ayudando el Sr. Aron Saltiel, myentres la preparasyon de su Rekolyo BODA.1 Akel diya fue un lavoro enteresante i estavamos bastante alegres. Ma, kerida amiga, oy no esto alegre. Mos estas mankando a todos.2
1 BODA es un rekolyo de kantikas de bodas sefardis de diversas sivdades o paizes. Es un lavoro muy riko realizado por el ENSEMBLE SALTIEL, debasho la direksyon del Sr. Aron Saltiel. Fue kon el propio ke aviyamos lavorado. En una pajina del Rekolyo (ke tuvo la jantiyes de mandarmos), esta rengransyando todas las personas ke, de una manera kontribuyeron a la realizasyon de este enteresante lavoro. En avlando de aki de aya kon el Sr. Saltiel, remarkimos ke teniyamos o tenemos munchas konosensyas komun, afilu, atajidos de famiya. Otruna sorpreza fue kuando le dishe ke konosi bien su madre i su famiya maternal.
2 La ultima Revista Kaminando i Avlando aparto una pajina a la disparisyon de Klara Perahya kon un teksto bastante largo, sinyado Sabetay Varol.
