Elon Musk. Ken es Elon Musk? Es un ombre de sensya. Los lavoros son sovre los otos elektronikos o sovre naves espasial (uzay gemisi). Es el patron de Tesla. Una de las mas rikas kompanyias del mundo. No va kontar aki lo ke izo o deke vino a la Turkiya. O sovre lo ke va azer mas, ni los penseryos. Ya se eskrivyo en todo modo de lugar. A mi lo ke me enteresa es, la lisyon ke mos esta dando este famozo ombre kon su vida karakteristika.
La misyon de E. Musk es de produsir teknolojias para ke la umanita kede empyes. E. Musk pensa ke los asteroides se estan pujando. Delantre de estos atakos, el mundo se esta aziendo de diya en diya mas prove. El mundo mas no es una kaza ke se puede defender.
Agora si tornamos al karakteristiko de E. Musk; el miraklo de el es la kuryozidad a la sensya. Syempre fue un chiko enteresado en los livros de sensya. Era un ninyo, ma tenia un mundo de imajinasyon muy grande. Los livros syempre mantenyeron ande el un mundo grande de iluzyon. I el koryo syempre detras de las iluzyones sin pensar dingun diya si se pueden reushir de azer. La razon ke Tesla es una marka grande, es ke un chiko penso i izo.
E. Musk i yenos de egzemplos komo Musk mos ambezan a mozos ke semos ovligados de avrir los meoyos de las kreaturas. Semos ovligados de dar mano para ke djugen, ke imajinen, ke pensen grande. Imajinar es un braso grande de la edukasyon. Kuando el sistema de edukasyon permete a los elevos de partisipar, traye i la reushita. El sistema de edukasyon kale ke se aleshe de la memorizasyon. Los padres i las madres kale ke kudyen a los chikos. Azer atansiyon ma no azer todo lo ke azen todos. La importansia es de avrir el kamino de la kreatura sovre su kapasidad. Observar bueno. Permitir de entrar al mundo de los livros. Permitir ke imajinen. Esto todo azerlo kon djugo, kon kaminar aryento del naturalizmo, i vijitar los muzeos. Estar syempre aryento de la vida…
Dingunos ke no se esvacheen de meldar konsejas afilu en syen anyos, no se esvacheen de imajinar, no se esvacheen de ser kreatura kon la kreatura. El futuro esta en los ninyos. Kedavos kon amistad.
