En kada dia ay una koza mueva ke se esta invento kon la teknolojiya mueva espesialmente en Israel, payis de invensiones. Un payis, ande las buenas kavesas son enkorajadas i por el governo i por el mundo akademiko a bushkar, bushkar, azer investigasiones i inventar muevas kozas siempre se va adelantre. La teknolojiya ayuda a azer la vida mas fasil. I meldimos resientemente ke los sientifikos toparon una boya para los tejados de las kazas ke va tomar la enerjiya del Sol i utilizarlo para arefreskar las kazas! Ke maraviya! Ya savesh ke aze muncha kalor en Israel i utilizan muncha enerjiya para los klimas ke tienen en todo modo de lugar. Kemar afuera, entezar aryentro! Ama kon esta invension no van a tener gastes ekstra para los klimas. Los tejados van a arefreskar las kazas. Una koza maraviyoza. I si entrash al sitio de Israel Innivation News: www.nocamels.com aya puedesh ver todas las inovasiones ke se estan topando en este pais de invensiones.
Hanuka alegre ke tengash!
