Antes de desidarme a eskrivir este artikolo, teniya ezitasyones sovre kual sujeto. Pensando un poko, dishe ke es egzaktamente el sujeto de mi titolo ke konviene, syendo ke antes unos kuantos diyas entri a mi mueva edad! Ma, antes de kontinuar me parese ke devo aklarar un punto importante. Ayer, 14 desembre fyestimos kon grande entuzyazmo el 70en Aniversaryo de muestro jurnal, Şalom.
Esto sigura ke las amigas van a eskrivir sovre este evento importante. Fue una nochada muy reushida.
Bueno, vinyendo a muestro sujeto, la persona esta adjustando anyos a sus anyos, en kurto se esta engrandesyendo. Ma deve tambien dezveloparse, adjustar una vida fruktuoza a sus anyos. No basta en vezes, solo a si mezmo, tambien i a la egzistensya de su derredor. Deshar rekuerdos i trasas inolvidavles, komo ayudos, amistades sinseras ets... Las personas ke saven kerer, partajar kon amistad, ke tienen syempre esperansas en sus korasones, moralmente kedan mansevos. A mi me plaze muncho los byervos de la kantika ke dize: Yo ya se lo ke es ser mansevo. Ma, tu no saves lo ke es ser aedado.
Keridos amigos i lektores, No es primera vez ke toko al sujeto de edad. Tengo eskrito unas kuantas vezes sovre este sujeto. Ma, me enteresi espesyalmente a la kestyon de MEMORYA i afilu tuve konversasyones kon un profesor psikologo, demandandole syertas kestyones. En el empesijo de mi teksto utilizi la ekspresyon “Adjustar anyos a muestros anyos por no dizir envejeser. Ma, no ay remedyo de enyegar la realidad de la egzistensya. No penso komentar una realidad. No ay dubyo ke en el korso de los anyos mos estamos dezvelopando seya fizikamente, seya mentalmente, ganando muevas konosensyas importantes.
Lo ke ay keridos lektores, es ke paralelamente, los anyos avagar, avagar estan azyendo su lavoro de destruksyon sovre el organismo i malorozamente sovre las fonksyones del meoyo. Es una realidad ke no puedemos trokar. Ma, par kontra ay remedyos de atrazar o de aminguar el danyo. Esto lo se personalmente i es la primera vez ke lo esto eksprimiendo en este teksto. Grasyas a los Sielos, dayinda no peryi la konfiensa en mi memorya.
Un proverbo ekosezo dize: “La djente pensan ke en bivyendo se envejesen. A la kontra, es en No bivyendo ke se envejesen.” Keridos lektores es a vozotros de komentar.
Orozamente ke ay amigos, amigas de mi jenerasyon ke pensan komo mi. Mos konosemos o no ke importa? Basta ke sepamos ke tenemos el mezmo buto, ke estamos aziendo muestro posivle para reushir, kon el amor de muestra Lingua i Kultura. En esta lucha estamos ombro kon ombro, kon mansevos tambien. Invyernada alegre i saluzoda keridos lektores.
