La semana pasada, fyestimos “HANUKA”, una de las fyestas las mas emportantes porke es la perioda de los Miraklos, de la Klaredad i de la Luz. Es una perioda kuando los kristyanos fyestan el Noel, i es la venida de una anyada mueva para todo el mundo a parte de los djudyos ke para eyos la anyada mueva empesa kon “Rosh Ashana”.
Hanuka se fyesta en una perioda ke es la perioda de los evenementos ke se terminan i de los empesijos. La luz esta en todo los momentos de muestra vida. I los miraklos tambyen...
Agora ke Hanuka ya se eskapo, vos kero ogurar una anyada mueva kon muncha klaredad i miraklos. El Dyo ke mos ayege para kada anyo kon sanedad, kon pas en el mundo i kon abondansya en muestras famiyas i muestra komunitad.
“ŞALOM”, muestra gazeta semanal fyesto sus 70 anyos en 14.12.2017, en el salon de la Municipalidad de Beşiktaş kon muncha djente i kon grande entuzyasmo.
A la entrada uvo una ekspozisyon de munchos artistos i fotografos. El nombre de esta ekspozisyon fue: “70 Anyos 70 Ovras”. Un kokteyl riko i el presidente de muestra komunidad “İshak İBRAHİMZADEH” kon “Deniz Saporta” arisivyeron a la entrada a los envitados kon kara riyendo i kon semplisidad. Un salon de 700 personas i los mansevos en pyes asistyeron a esta nochada.
“İvo Molinas” ampeso su avla en kontando la istorya del Şalom, komo salyo en medyo este jurnal presyozo en el anyo 1947 kon el esforso de “Avram Leyon” (z”l). El jurnal entero era en Ladino akel tyempo, ma oy es enteramente en turko solamente kon una pajina en Ladino.
“Oy ay solamente 17.000 djudyos en Turkiya i Şalom seyga kon el kontenido, seyga kon una armada de eskritores voluntaryos es un jurnal ke en toda la Turkiya se esta sigiendo (takip edilmek) kon grande entereso. Kon la fuersa ke esta tomando de su nombre, Şalom ke kere dizir “Pas” va kontinuar a usar la lingua de pas. Kon el apoyo de todos vozotros, Şalom syempre va avansar i va reushir en su espasyo”. Despues envitaron a la shena al presidente
“İshak İbrahimzadeh” ke avlo de la emportansa i del lugar ke tyene esta gazeta en muestra komunidad. El kon su semplisidad, modestiya i kon su avla dulse remersyo a todos los eskrivanos voluntaryos, los karikaturistos en alevantandolos en pyes i aplodisandolos.
A la fin, el grand rabino Rav İsak Haleva asendyo la Hanukiya kon todos i la nochada se termino kon el konserto maraviyozo ma muy kurto del famozo kantador: “Danny Brillant”. Fue una nochada reushida kon todo djusto. Al 17.12 Alhad, mos fuimos a ver el teatro “KULA ‘930” ke se metyo en shena despues de 40 anyos.
El buto de djugar de muevo tres vezes en un salon de 700 personas fue de ayudar, de dar apoyo a los mansevos ke keren estudyar la universidad ma ke no tyenen la possibilidad materyalmente. Es un evenemento sakro de pueder kontribuir a este buto porke la manseves es el avenir de una komunidad. El dirijente era “Ferit Kohen”, un mansevo de 33 anyos ke tyene talento i es eksperimantado sovre este sujeto.
Su ayudante fue Yusuf Şarhon.
El dekor, los kostumes, el makyaj, las kantikas, la orkestra i la armada de los voluntaryos reusheron en una perioda kurta komo tres mezes.
“KULA ‘930” es el solo teatro ke se esta djugando en Ladino en el mundo entero. Se djugo en el anyo 1977 i despues en 1988 i mas despues en 2002 en el Dostluk Yurdu Derneği. Mizmo se fueron a İzmir, a Tel-Aviv… i tuvyeron grande sukseso.
Me emborrachi de ver a las 700 personas aplodisando en pyes; ken yorando, ken riyendo, ken felisitando a todos; del mas chiko, al mas grande; todos los ke djugaron i penaron para esta ovra ekstraordinarya.
Syempre de mijor a mijor.
Felisitasyones a todos los dirijentes i los artistos de tener la voluntad de krear estos projektos para pueder kontribuir a un buto emportante.
La amistad ke tenesh entre vozotros, ke puje de dia en dia para motivar i adelantar kon munchas reushidades!
