Estuve presente en la sinagoga de ORTAKÖY, meldando la perasha VAYEHI
En mi livro “RIJKSMUSEUM AMSTERDAM PEINTURES” selebre por su koleksion de pinturas del siglo 17, ke se nombra “SIGLO DE ORO”, se remarka las ovras de:
REMBRANDT HARMENSZ VAN RIJN (1606 - 1669), VERMEER, FRANS HALS, ets. Mostran klaramente a ke punto el arte de los Payises-Bashos Nordikos de la Edad Media i del Renasimiento a esta epoka, se apartavan de los payises vizinos.
En la Olanda, los rikos de la burgesia enkomendavan pinturas a munchos pintores, keriendo ornar sus paredes. Los artistas se spesializaron i krearon la perfeksion kon los sujetos grandiozos komo portretos, naturas muertas, peysajes, sovre todo pintando shenas de la Biblia (el Ansiano Testamento).
Se puede apresiar la kualita estetika de las imajenes ke mos permeten en mismo tiempo de desvelopar la konosensia de la “Istoria del Arte” de la epoka (1610-1640), la influensia de Georges de la Tour, ets.
Munchas relijiones konfiaron a los artistos el plazer de ilustrar los tekstos sakrados. Se remarka este elemento importante en el 17en siglo.
La aparision de tablós relijiozos sirvio para azer konoser a los ke no savian meldar i aprenderles los sentimientos relijiozos. Ma savemos ke muestra relijion no tolerava las figuras...
ME VA PERMETER DE AVLAR DE LA PERASHA DE LA SEMANA, mizmo ke no so kompetente...
Yosef djuro de azer el komando de su padre, Yaakov.
La favor ke rogo Yaakov a su ijo Yosef era de ser enterrado ande repozavan sus padres Avraam i Yitshak, en la tierra de Kenaan (en la meara).
Kuando Yaakov arivo a sus 147 anyos, komo estava hazino, akompanyado de sus ijos, Yosef fue a ver a su padre. Resivido kon muncha amistad, Yosef fue bendicho, el i sus ijos, Menashe i Efrayim, los dos ermanos remarkavles ke se avenian muncho. YAAKOV konsidero estos dos inyetos komo sus ijos, elevandolos al estatuo de sus propios ijos, komo prodjenitores de tribus de la nasion de Yisrael.
YAAKOV yamo tambien a todos sus ijos i les enkomendo de komportarsen kon amistad unos kon otros i ke no manken de servir al Dyo Santo, eyos i todas sus famiyas.
Resivieron kada uno i uno bendision sigun su meresimiento.
La novela triste se sintyo en todo Ejipto, i lo yoraron 70 dias.
Despues de 70 dias de dolyo, Yosef demando a Paro la permission de ir a yevar a su padre Yaakov para enterrarlo en la tierra de Kenaan.
Paro le permetio de azer la enkomendansa de su padre Yaakov.
En mizmo tiempo Paro ordeno a Yosef i de azerle una seremonia grande i onorarlo en yevandolo a HEVRON en KENAAN. Asistieron todos los personajes de la sivdad i lo onoraron.
YOSEF muryo a la edad de 110 anyos. Lo enterraron en el bodre del rio Nilas.
En la salidura de Ejipto no manko Moshe Rabenu de kumplir el dezeo de Yosef Atsadik i komo su padre, de kitarlo i enterrar sus guesos en la tierra de Kenaan.
Keridos lektores,
Vos sueto de realizar vuestros suenyos djuntos kon vuestros keridos.
Anyada klara i pas en 2018.
