Ken es Abraham Lincoln? El es konosido komo el mijor prezidente ke tyene vinido a Los Estados Unidos. Tuvo una vida muy empresyonante sovre su puevlo. El nasyo en el anyo 1809 en una famiya sin edukasyon ma el kon su intelijensya superyor i grande modestiya parvino a ser avokato i prezidente de su estado.
El fue el ke eskapo la esklavidud i empeso el “Suenyo Amerikano”. El dyo grande emportansa a los estudyos. Teniya una maraviyoza fuersa de influensar a su puevlo kon su avla i kon sus ideas.
Tuvo kuatro ijos. En las linyas sigientes vash a topar unas kuantas notisyas kurtas de la letra ke eskrivyo al profesor de su ijo rogandole ke le ambeze el kamino derecho en la vida.
“Kerido Maestro,
Es muy nesesaryo ke mi ijo se ambeze ke todas las personas no son onestas i djustas ma ensenyale ke para kada enemigo ay un kompanyero.
Ya se ke te va tomar muncho tyempo ma ambezale ke un dolar ganado es mas presiyozo ke de sinko dolares topados.
Ambezale ke kale saver i la pyedrita i ke kale tomar plazer de la ganansya. Si puedes amostrale komo kedarse leshos del selo.
Ansenyale las maraviyas de los livros i de meldar i de topar plazer en la serenidad de la natura.
Dizele ke mijor vale tomar una nota negra sin valor ke de kopyar.
Dizele ke tenga kreensya en sus ideas.
Ambezale a ke syenta a la djente i ke tome en konsiderasyon lo ke es bueno.
Ambezale ke yorar i lagrimas no son kozas de averguensar.
I ke aga muncha atansyon a los ke le amostran mas de su demaziya muncha amista.
Si kreye ke esta en kamino derecho ke no se ezvacheye de luchar por este kamino.
Komportate kon kortesiya (nezaket) ma no lo protejes.
Deshalo ke tenga koraje, pasensya i konfiyensa en si. En esta manera se ambezara a tener una grande fe (inanç) en la umanidad.
Ya se ke te esto demandando muncho ma mira ver de azer lo ke puedes. El es una persona tanto chiko. Es mi ijo.”
